Gita - Easy Chanting - Chapter 9

ಶ್ರೀಮದ್ಭಗವದ್ಗೀತಾ ಮೂಲಂ - ನವಮೋಽಧ್ಯಾಯಃ

ಓಂ ಶ್ರೀಪರಮಾತ್ಮನೇ ನಮಃ
ಅಥ ನವಮೋಽಧ್ಯಾಯಃ ।
ರಾಜವಿದ್ಯಾರಾಜಗುಹ್ಯಯೋಗಃ

ಶ್ರೀಭಗವಾನುವಾಚ
ಇದಂ ತು ತೇ ಗುಹ್ಯತಮಂ / ಪ್ರವಕ್ಷ್ಯಾಮ್ಯನಸೂಯವೇ ।
ಜ್ಞಾನಂ ವಿಜ್ಞಾನಸಹಿತಂ / ಯತ್-ಜ್ಙಾತ್ವಾ ಮೋಕ್ಷ್ಯಸೇಽಶುಭಾತ್ ॥ 1 ॥

ರಾಜವಿದ್ಯಾ ರಾಜಗುಹ್ಯಂ / ಪವಿತ್ರಮಿದಮುತ್ತಮಮ್ ।
ಪ್ರತ್ಯಕ್ಷಾವಗಮಂ ಧರ್ಮ್ಯಂ / ಸುಸುಖಂ ಕರ್ತುಮವ್ಯಯಮ್ ॥ 2 ॥

ಅಶ್ರದ್ದಧಾನಾಃ ಪುರುಷಾಃ / ಧರ್ಮಸ್ಯಾಸ್ಯ ಪರಂತಪ ।
ಅಪ್ರಾಪ್ಯ ಮಾಂ ನಿವರ್ತಂತೇ / ಮೃತ್ಯು-ಸಂಸಾರ-ವರ್ತ್ಮನಿ ॥ 3 ॥

ಮಯಾ ತತಮಿದಂ ಸರ್ವಂ / ಜಗದ್-ಅವ್ಯಕ್ತ-ಮೂರ್ತಿನಾ ।
ಮತ್-ಸ್ಥಾನಿ ಸರ್ವಭೂತಾನಿ / ನ ಚಾಹಂ ತೇಷ್ವವಸ್ಥಿತಃ ॥ 4 ॥

ನ ಚ ಮತ್-ಸ್ಥಾನಿ ಭೂತಾನಿ / ಪಶ್ಯ ಮೇ ಯೋಗಮೈಶ್ವರಮ್ ।
ಭೂತಭೃನ್ನ ಚ ಭೂತಸ್ಥೋ / ಮಮಾತ್ಮಾ ಭೂತಭಾವನಃ ॥ 5 ॥

ಯಥಾಕಾಶಸ್ಥಿತೋ ನಿತ್ಯಂ / ವಾಯುಃ ಸರ್ವತ್ರಗೋ ಮಹಾನ್ ।
ತಥಾ ಸರ್ವಾಣಿ ಭೂತಾನಿ / ಮತ್ಸ್ಥಾನೀತ್ಯುಪಧಾರಯ ॥ 6 ॥

ಸರ್ವಭೂತಾನಿ ಕೌಂತೇಯ / ಪ್ರಕೃತಿಂ ಯಾಂತಿ ಮಾಮಿಕಾಮ್ ।
ಕಲ್ಪಕ್ಷಯೇ ಪುನಸ್ತಾನಿ / ಕಲ್ಪಾದೌ ವಿಸೃಜಾಮ್ಯಹಮ್ ॥ 7 ॥

ಪ್ರಕೃತಿಂ ಸ್ವಾಮವಷ್ಟಭ್ಯ / ವಿಸೃಜಾಮಿ ಪುನಃ ಪುನಃ ।
ಭೂತಗ್ರಾಮಮಿಮಂ ಕೃತ್ಸ್ನಮ್ / ಅವಶಂ ಪ್ರಕೃತೇರ್-ವಶಾತ್ ॥ 8 ॥

ನ ಚ ಮಾಂ ತಾನಿ ಕರ್ಮಾಣಿ / ನಿಬಧ್ನಂತಿ ಧನಂಜಯ ।
ಉದಾಸೀನವದಾಸೀನಮ್ / ಅಸಕ್ತಂ ತೇಷು ಕರ್ಮಸು ॥ 9 ॥

ಮಯಾಧ್ಯಕ್ಷೇಣ ಪ್ರಕೃತಿಃ / ಸೂಯತೇ ಸಚರಾಚರಮ್ ।
ಹೇತುನಾನೇನ ಕೌಂತೇಯ / ಜಗದ್-ವಿಪರಿವರ್ತತೇ ॥ 10 ॥

ಅವಜಾನಂತಿ ಮಾಂ ಮೂಢಾ / ಮಾನುಷೀಂ ತನುಮಾಶ್ರಿತಮ್ ।
ಪರಂ ಭಾವಮಜಾನಂತೋ / ಮಮ ಭೂತ-ಮಹೇಶ್ವರಮ್ ॥ 11 ॥

ಮೋಘಾಶಾ ಮೋಘಕರ್ಮಾಣೋ / ಮೋಘಜ್ಞಾನಾ ವಿಚೇತಸಃ ।
ರಾಕ್ಷಸೀಮಾಸುರೀಂ ಚೈವ / ಪ್ರಕೃತಿಂ ಮೋಹಿನೀಂ ಶ್ರಿತಾಃ ॥ 12 ॥

ಮಹಾತ್ಮಾನಸ್ತು ಮಾಂ ಪಾರ್ಥ / ದೈವೀಂ ಪ್ರಕೃತಿಮಾಶ್ರಿತಾಃ ।
ಭಜಂತ್ಯನನ್ಯಮನಸೋ / ಜ್ಞಾತ್ವಾ ಭೂತಾದಿಮವ್ಯಯಮ್ ॥ 13 ॥

ಸತತಂ ಕೀರ್ತಯಂತೋ ಮಾಂ / ಯತಂತಶ್ಚ ದೃಢವ್ರತಾಃ ।
ನಮಸ್ಯಂತಶ್ಚ ಮಾಂ ಭಕ್ತ್ಯಾ / ನಿತ್ಯಯುಕ್ತಾ ಉಪಾಸತೇ ॥ 14 ॥

ಜ್ಞಾನಯಜ್ಞೇನ ಚಾಪ್ಯನ್ಯೇ / ಯಜಂತೋ ಮಾಮುಪಾಸತೇ ।
ಏಕತ್ವೇನ ಪೃಥಕ್ತ್ವೇನ / ಬಹುಧಾ ವಿಶ್ವತೋಮುಖಮ್ ॥ 15 ॥

ಅಹಂ ಕ್ರತುರಹಂ ಯಜ್ಞಃ / ಸ್ವಧಾಹಮ್-ಅಹಮ್-ಔಷಧಮ್ ।
ಮಂತ್ರೋಽಹಮ್-ಅಹಮೇವಾಜ್ಯಮ್ / ಅಹಮಗ್ನಿರ್-ಅಹಂ ಹುತಮ್ ॥ 16 ॥

ಪಿತಾಹಮಸ್ಯ ಜಗತೋ / ಮಾತಾ ಧಾತಾ ಪಿತಾಮಹಃ ।
ವೇದ್ಯಂ ಪವಿತ್ರಮೋಂಕಾರ / ಋಕ್-ಸಾಮ ಯಜುರೇವ ಚ ॥ 17 ॥

ಗತಿರ್ಭರ್ತಾ ಪ್ರಭುಃ ಸಾಕ್ಷೀ / ನಿವಾಸಃ ಶರಣಂ ಸುಹೃತ್ ।
ಪ್ರಭವಃ ಪ್ರಲಯಃ ಸ್ಥಾನಂ / ನಿಧಾನಂ ಬೀಜಮವ್ಯಯಮ್ ॥ 18 ॥

ತಪಾಮ್ಯಹಮಹಂ ವರ್ಷಂ / ನಿಗೃಹ್ಣಾಮ್ಯುತ್ಸೃಜಾಮಿ ಚ ।
ಅಮೃತಂ ಚೈವ ಮೃತ್ಯುಶ್ಚ / ಸದಸಚ್ಚಾಹಮ್-ಅರ್ಜುನ ॥ 19 ॥

ತ್ರೈವಿದ್ಯಾ ಮಾಂ ಸೋಮಪಾಃ ಪೂತಪಾಪಾ / ಯಜ್ಞೈರಿಷ್ಟ್ವಾ ಸ್ವರ್ಗತಿಂ ಪ್ರಾರ್ಥಯಂತೇ।
ತೇ ಪುಣ್ಯಮಾಸಾದ್ಯ ಸುರೇಂದ್ರಲೋಕಮ್ / ಅಶ್ನಂತಿ ದಿವ್ಯಾಂದಿವಿ ದೇವಭೋಗಾನ್ ॥ 20 ॥

ತೇ ತಂ ಭುಕ್ತ್ವಾ ಸ್ವರ್ಗಲೋಕಂ ವಿಶಾಲಂ / ಕ್ಷೀಣೇ ಪುಣ್ಯೇ ಮರ್ತ್ಯಲೋಕಂ ವಿಶಂತಿ।
ಏವಂ ತ್ರಯೀ-ಧರ್ಮಮ್-ಅನುಪ್ರಪನ್ನಾ / ಗತಾಗತಂ ಕಾಮಕಾಮಾ ಲಭಂತೇ ॥ 21 ॥

ಅನನ್ಯಾಶ್ಚಿಂತಯಂತೋ ಮಾಂ / ಯೇ ಜನಾಃ ಪರ್ಯುಪಾಸತೇ ।
ತೇಷಾಂ ನಿತ್ಯಾಭಿಯುಕ್ತಾನಾಂ / ಯೋಗಕ್ಷೇಮಂ ವಹಾಮ್ಯಹಮ್ ॥ 22॥

ಯೇಽಪ್ಯನ್ಯದೇವತಾ ಭಕ್ತಾಃ / ಯಜಂತೇ ಶ್ರದ್ಧಯಾನ್ವಿತಾಃ ।
ತೇಽಪಿ ಮಾಮೇವ ಕೌಂತೇಯ / ಯಜಂತ್ಯವಿಧಿ ಪೂರ್ವಕಮ್ ॥ 23 ॥

ಅಹಂ ಹಿ ಸರ್ವಯಜ್ಞಾನಾಂ / ಭೋಕ್ತಾ ಚ ಪ್ರಭುರೇವ ಚ ।
ನ ತು ಮಾಮಭಿಜಾನಂತಿ / ತತ್ತ್ವೇನಾತಶ್ಚ್ಯವಂತಿ ತೇ ॥ 24 ॥

ಯಾಂತಿ ದೇವವ್ರತಾ ದೇವಾನ್ / ಪೃತೄನ್-ಯಾಂತಿ ಪಿತೃವ್ರತಾಃ ।
ಭೂತಾನಿ ಯಾಂತಿ ಭೂತೇಜ್ಯಾ / ಯಾಂತಿ ಮದ್-ಯಾಜಿನೋಽಪಿ ಮಾಮ್ ॥ 25 ॥

ಪತ್ರಂ ಪುಷ್ಪಂ ಫಲಂ ತೋಯಂ / ಯೋ ಮೇ ಭಕ್ತ್ಯಾ ಪ್ರಯಚ್ಛತಿ ।
ತದಹಂ ಭಕ್ತ್ಯುಪಹೃತಮ್ / ಅಶ್ನಾಮಿ ಪ್ರಯತಾತ್ಮನಃ ॥ 26 ॥

ಯತ್ಕರೋಷಿ ಯದಶ್ನಾಸಿ / ಯಜ್ಜುಹೋಷಿ ದದಾಸಿ ಯತ್ ।
ಯತ್ತಪಸ್ಯಸಿ ಕೌಂತೇಯ / ತತ್ಕುರುಷ್ವ ಮದರ್ಪಣಮ್ ॥ 27 ॥

ಶುಭಾಶುಭಫಲೈರೇವಂ / ಮೋಕ್ಷ್ಯಸೇ ಕರ್ಮಬಂಧನೈಃ ।
ಸಂನ್ಯಾಸ-ಯೋಗ-ಯುಕ್ತಾತ್ಮಾ / ವಿಮುಕ್ತೋ ಮಾಮ್-ಉಪೈಷ್ಯಸಿ ॥ 28 ॥

ಸಮೋಽಹಂ ಸರ್ವಭೂತೇಷು / ನ ಮೇ ದ್ವೇಷ್ಯೋಽಸ್ತಿ ನ ಪ್ರಿಯಃ ।
ಯೇ ಭಜಂತಿ ತು ಮಾಂ ಭಕ್ತ್ಯಾ / ಮಯಿ ತೇ ತೇಷು ಚಾಪ್ಯಹಮ್ ॥ 29 ॥

ಅಪಿ ಚೇತ್-ಸುದುರಾಚಾರೋ / ಭಜತೇ ಮಾಮ್-ಅನನ್ಯ-ಭಾಕ್ ।
ಸಾಧುರೇವ ಸ ಮಂತವ್ಯಃ / ಸಮ್ಯಗ್-ವ್ಯವಸಿತೋ ಹಿ ಸಃ ॥ 30 ॥

ಕ್ಷಿಪ್ರಂ ಭವತಿ ಧರ್ಮಾತ್ಮಾ / ಶಶ್ವಚ್ಛಾಂತಿಂ ನಿಗಚ್ಛತಿ ।
ಕೌಂತೇಯ ಪ್ರತಿಜಾನೀಹಿ / ನ ಮೇ ಭಕ್ತಃ ಪ್ರಣಶ್ಯತಿ ॥ 31 ॥

ಮಾಂ ಹಿ ಪಾರ್ಥ ವ್ಯಪಾಶ್ರಿತ್ಯ / ಯೇಽಪಿ ಸ್ಯುಃ ಪಾಪಯೋನಯಃ ।
ಸ್ತ್ರಿಯೋ ವೈಶ್ಯಾಸ್ತಥಾ ಶೂಧ್ರಾಃ / ತೇಽಪಿ ಯಾಂತಿ ಪರಾಂ ಗತಿಮ್ ॥ 32 ॥

ಕಿಂ ಪುನರ್ಬ್ರಾಹ್ಮಣಾಃ / ಪುಣ್ಯಾ ಭಕ್ತಾ ರಾಜರ್ಷಯಸ್ತಥಾ ।
ಅನಿತ್ಯಮಸುಖಂ ಲೋಕಮ್ / ಇಮಂ ಪ್ರಾಪ್ಯ ಭಜಸ್ವ ಮಾಮ್ ॥ 33 ॥

ಮನ್ಮನಾ ಭವ ಮದ್ಭಕ್ತೋ / ಮದ್ಯಾಜೀ ಮಾಂ ನಮಸ್ಕುರು ।
ಮಾಮೇವೈಷ್ಯಸಿ ಯುಕ್ತ್ವೈವಮ್ / ಆತ್ಮಾನಂ ಮತ್ಪರಾಯಣಃ ॥ 34 ॥

ಓಂ ತತ್ಸದಿತಿ ಶ್ರೀಮದ್ಭಗವದ್ಗೀತಾಸೂಪನಿಷತ್ಸು ಬ್ರಹ್ಮವಿದ್ಯಾಯಾಂ ಯೋಗಶಾಸ್ತ್ರೇ
ಶ್ರೀಕೃಷ್ಣಾರ್ಜುನಸಂವಾದೇ ರಾಜವಿದ್ಯಾರಾಜಗುಹ್ಯಯೋಗೋ ನಾಮ ನವಮೋಽಧ್ಯಾಯಃ ॥9 ॥