ಶ್ರೀಮದ್ಭಗವದ್ಗೀತಾ ಮೂಲಂ - ಸಪ್ತದಶೋಽಧ್ಯಾಯಃ
ಓಂ ಶ್ರೀ ಪರಮಾತ್ಮನೇ ನಮಃ
ಅಥ ಸಪ್ತದಶೋಽಧ್ಯಾಯಃ ।
ಶ್ರದ್ಧಾತ್ರಯವಿಭಾಗಯೋಗಃ
ಅರ್ಜುನ ಉವಾಚ
ಯೇ ಶಾಸ್ತ್ರ-ವಿಧಿಮ್-ಉತ್ಸೃಜ್ಯ / ಯಜಂತೇ ಶ್ರದ್ಧಯಾನ್ವಿತಾಃ ।
ತೇಷಾಂ ನಿಷ್ಠಾ ತು ಕಾ ಕೃಷ್ಣ / ಸತ್ತ್ವಮಾಹೋ ರಜಸ್ತಮಃ ॥ 1 ॥
ಶ್ರೀಭಗವಾನುವಾಚ
ತ್ರಿವಿಧಾ ಭವತಿ ಶ್ರದ್ಧಾ / ದೇಹಿನಾಂ ಸಾ ಸ್ವಭಾವಜಾ ।
ಸಾತ್ತ್ವಿಕೀ ರಾಜಸೀ ಚೈವ / ತಾಮಸೀ ಚೇತಿ ತಾಂ ಶೃಣು ॥ 2 ॥
ಸತ್ತ್ವಾನುರೂಪಾ ಸರ್ವಸ್ಯ / ಶ್ರದ್ಧಾ ಭವತಿ ಭಾರತ ।
ಶ್ರದ್ಧಾಮಯೋಽಯಂ ಪುರುಷೋ / ಯೋ ಯಚ್ಛ್ರದ್ಧಃ ಸ ಏವ ಸಃ ॥ 3 ॥
ಯಜಂತೇ ಸಾತ್ತ್ವಿಕಾ ದೇವಾನ್ / ಯಕ್ಷ-ರಕ್ಷಾಂಸಿ ರಾಜಸಾಃ ।
ಪ್ರೇತಾನ್-ಭೂತಗಣಾಂಶ್ಚಾನ್ಯೇ / ಯಜಂತೇ ತಾಮಸಾ ಜನಾಃ ॥ 4 ॥
ಅಶಾಸ್ತ್ರವಿಹಿತಂ ಘೋರಂ / ತಪ್ಯಂತೇ ಯೇ ತಪೋ ಜನಾಃ ।
ದಂಭಾಹಂಕಾರ-ಸಂಯುಕ್ತಾಃ / ಕಾಮ-ರಾಗ-ಬಲಾನ್ವಿತಾಃ ॥ 5 ॥
ಕರ್ಷಯಂತಃ ಶರೀರಸ್ಥಂ / ಭೂತಗ್ರಾಮಮಚೇತಸಃ ।
ಮಾಂ ಚೈವಾಂತಃಶರೀರಸ್ಥಂ / ತಾನ್ವಿದ್ಧ್ಯಾಸುರ-ನಿಶ್ಚಯಾನ್ ॥ 6 ॥
ಆಹಾರಸ್ತ್ವಪಿ ಸರ್ವಸ್ಯ / ತ್ರಿವಿಧೋ ಭವತಿ ಪ್ರಿಯಃ ।
ಯಜ್ಞಸ್-ತಪಸ್-ತಥಾ ದಾನಂ / ತೇಷಾಂ ಭೇದಮಿಮಂ ಶೃಣು ॥ 7 ॥
ಆಯುಃ-ಸತ್ತ್ವ-ಬಲಾರೋಗ್ಯ / ಸುಖ-ಪ್ರೀತಿ-ವಿವರ್ಧನಾಃ ।
ರಸ್ಯಾಃ ಸ್ನಿಗ್ಧಾಃ ಸ್ಥಿರಾ ಹೃದ್ಯಾ / ಆಹಾರಾಃ ಸಾತ್ತ್ವಿಕ-ಪ್ರಿಯಾಃ ॥ 8 ॥
ಕಟ್ವಮ್ಲ-ಲವಣಾತ್ಯುಷ್ಣ / ತೀಕ್ಷ್ಣ-ರೂಕ್ಷ-ವಿದಾಹಿನಃ ।
ಆಹಾರಾ ರಾಜಸಸ್ಯೇಷ್ಟಾ / ದುಃಖ-ಶೋಕಾಮಯ-ಪ್ರದಾಃ ॥ 9 ॥
ಯಾತಯಾಮಂ ಗತರಸಂ / ಪೂತಿ ಪರ್ಯುಷಿತಂ ಚ ಯತ್ ।
ಉಚ್ಛಿಷ್ಟಮಪಿ ಚಾಮೇಧ್ಯಂ / ಭೋಜನಂ ತಾಮಸ-ಪ್ರಿಯಮ್ ॥ 10 ॥
ಅಫಲಾಕಾಂಕ್ಷಿಭಿರ್ಯಜ್ಞೋ / ವಿಧಿ-ದೃಷ್ಟೋ ಯ ಇಜ್ಯತೇ ।
ಯಷ್ಟವ್ಯಮೇವೇತಿ ಮನಃ / ಸಮಾಧಾಯ ಸ ಸಾತ್ತ್ವಿಕಃ ॥ 11 ॥
ಅಭಿಸಂಧಾಯ ತು ಫಲಂ / ದಂಭಾರ್ಥಮಪಿ ಚೈವ ಯತ್ ।
ಇಜ್ಯತೇ ಭರತಶ್ರೇಷ್ಠ ತಂ / ಯಜ್ಞಂ ವಿದ್ಧಿ ರಾಜಸಮ್ ॥ 12 ॥
ವಿಧಿಹೀನಮ್-ಅಸೃಷ್ಟಾನ್ನಂ / ಮಂತ್ರಹೀನಮ್-ಅದಕ್ಷಿಣಮ್ ।
ಶ್ರದ್ಧಾವಿರಹಿತಂ ಯಜ್ಙಂ / ತಾಮಸಂ ಪರಿಚಕ್ಷತೇ ॥ 13 ॥
ದೇವ-ದ್ವಿಜ-ಗುರುಪ್ರಾಜ್ಞ / ಪೂಜನಂ ಶೌಚಮಾರ್ಜವಮ್ ।
ಬ್ರಹ್ಮಚರ್ಯಮ್-ಅಹಿಂಸಾ ಚ / ಶಾರೀರಂ ತಪ ಉಚ್ಯತೇ ॥ 14 ॥
ಅನುದ್ವೇಗಕರಂ ವಾಕ್ಯಂ / ಸತ್ಯಂ ಪ್ರಿಯಹಿತಂ ಚ ಯತ್ ।
ಸ್ವಾಧ್ಯಾಯಾಭ್ಯಸನಂ ಚೈವ / ವಾಙ್ಮಯಂ ತಪ ಉಚ್ಯತೇ ॥ 15 ॥
ಮನಃ ಪ್ರಸಾದಃ ಸೌಮ್ಯತ್ವಂ / ಮೌನಮಾತ್ಮ-ವಿನಿಗ್ರಹಃ ।
ಭಾವ-ಸಂಶುದ್ಧಿರ್- ಇತ್ಯೇತತ್ / ತಪೋ ಮಾನಸಮುಚ್ಯತೇ ॥ 16 ॥
ಶ್ರದ್ಧಯಾ ಪರಯಾ ತಪ್ತಂ / ತಪಸ್-ತತ್-ತ್ರಿವಿಧಂ ನರೈಃ ।
ಅಫಲಾ-ಕಾಂಕ್ಷಿಭಿರ್-ಯುಕ್ತೈಃ / ಸಾತ್ತ್ವಿಕಂ ಪರಿಚಕ್ಷತೇ ॥ 17 ॥
ಸತ್ಕಾರ-ಮಾನ-ಪೂಜಾರ್ಥಂ / ತಪೋ ದಂಭೇನ ಚೈವ ಯತ್ ।
ಕ್ರಿಯತೇ ತದಿಹ ಪ್ರೋಕ್ತಂ / ರಾಜಸಂ-ಚಲಮಧ್ರುವಮ್ ॥ 18 ॥
ಮೂಢ-ಗ್ರಾಹೇಣಾತ್ಮನೋ ಯತ್ / ಪೀಡಯಾ ಕ್ರಿಯತೇ ತಪಃ ।
ಪರಸ್ಯೋತ್ಸಾದನಾರ್ಥಂ ವಾ / ತತ್-ತಾಮಸಮುದಾಹೃತಮ್ ॥ 19 ॥
ದಾತವ್ಯಮಿತಿ ಯದ್ದಾನಂ / ದೀಯತೇಽನುಪಕಾರಿಣೇ ।
ದೇಶೇ ಕಾಲೇ ಚ ಪಾತ್ರೇ ಚ / ತದ್ದಾನಂ ಸಾತ್ತ್ವಿಕಂ ಸ್ಮೃತಮ್ ॥ 20 ॥
ಯತ್ತು ಪ್ರತ್ತ್ಯುಪಕಾರಾರ್ಥಂ / ಫಲಮುದ್ದಿಶ್ಯ ವಾ ಪುನಃ ।
ದೀಯತೇ ಚ ಪರಿಕ್ಲಿಷ್ಟಂ / ತದ್ದಾನಂ ರಾಜಸಂ ಸ್ಮೃತಮ್ ॥ 21 ॥
ಅದೇಶಕಾಲೇ ಯದ್ದಾನಮ್ / ಅಪಾತ್ರೇಭ್ಯಶ್ಚ ದೀಯತೇ ।
ಅಸತ್ಕೃತಮ್-ಅವಜ್ಞಾತಂ / ತತ್-ತಾಮಸಮುದಾಹೃತಮ್ ॥ 22 ॥
ಓಂ ತತ್ಸದಿತಿ ನಿರ್ದೇಶೋ / ಬ್ರಹ್ಮಣಸ್-ತ್ರಿವಿಧಃ ಸ್ಮೃತಃ ।
ಬ್ರಾಹ್ಮಣಾಸ್ತೇನ ವೇದಾಶ್ಚ / ಯಜ್ಞಾಶ್ಚ ವಿಹಿತಾಃ ಪುರಾ ॥ 23 ॥
ತಸ್ಮಾದ್-ಓಂ-ಇತ್ಯುದಾಹೃತ್ಯ / ಯಜ್ಞ-ದಾನ-ತಪಃ-ಕ್ರಿಯಾಃ ।
ಪ್ರವರ್ತಂತೇ ವಿಧಾನೋಕ್ತಾಃ / ಸತತಂ ಬ್ರಹ್ಮವಾದಿನಾಮ್ ॥ 24 ॥
ತದಿತ್ಯನಭಿಸಂಧಾಯ / ಫಲಂ ಯಜ್ಞ-ತಪಃ-ಕ್ರಿಯಾಃ ।
ದಾನಕ್ರಿಯಾಶ್ಚ ವಿವಿಧಾಃ / ಕ್ರಿಯಂತೇ ಮೋಕ್ಷ-ಕಾಂಕ್ಷಿಭಿಃ ॥ 25 ॥
ಸದ್ಭಾವೇ ಸಾಧುಭಾವೇ ಚ / ಸದಿತ್ಯೇತ್-ಪ್ರಯುಜ್ಯತೇ ।
ಪ್ರಶಸ್ತೇ ಕರ್ಮಣಿ ತಥಾ / ಸತ್-ಶಬ್ದಃ ಪಾರ್ಥ ಯುಜ್ಯತೇ ॥ 26 ॥
ಯಜ್ಞೇ ತಪಸಿ ದಾನೇ ಚ / ಸ್ಥಿತಿಃ ಸದಿತಿ ಚೋಚ್ಯತೇ ।
ಕರ್ಮ ಚೈವ ತದರ್ಥೀಯಂ / ಸದಿತ್ಯೇವಾಭಿಧೀಯತೇ ॥ 27 ॥
ಅಶ್ರದ್ಧಯಾ ಹುತಂ ದತ್ತಂ / ತಪಸ್ತಪ್ತಂ ಕೃತಂ ಚ ಯತ್ ।
ಅಸದಿತ್ಯುಚ್ಯತೇ ಪಾರ್ಥ / ನ ಚ ತತ್ಪ್ರೇಪ್ಯ ನೋ ಇಹ ॥ 28 ॥
ಓಂ ತತ್ಸದಿತಿ ಶ್ರೀಮದ್ಭಗವದ್ಗೀತಾಸೂಪನಿಷತ್ಸು ಬ್ರಹ್ಮವಿದ್ಯಾಯಾಂ ಯೋಗಶಾಸ್ತ್ರೇ
ಶ್ರೀಕೃಷ್ಣಾರ್ಜುನಸಂವಾದೇ ಶ್ರದ್ಧಾತ್ರಯವಿಭಾಗಯೋಗೋ ನಾಮ ಸಪ್ತದಶೋಽಧ್ಯಾಯಃ ॥17 ॥
Comments
Post a Comment