Gita - Easy Chanting - Chapter 11

ಶ್ರೀಮದ್ಭಗವದ್ಗೀತಾ ಮೂಲಂ - ಏಕಾದಶೋಽಧ್ಯಾಯಃ
ಓಂ ಶ್ರೀ ಪರಮಾತ್ಮನೇ ನಮಃ
ಅಥ ಏಕಾದಶೋಽಧ್ಯಾಯಃ ।
ವಿಶ್ವರೂಪಸಂದರ್ಶನಯೋಗಃ

ಅರ್ಜುನ ಉವಾಚ
ಮದನುಗ್ರಹಾಯ ಪರಮಂ / ಗುಹ್ಯಮ್-ಅಧ್ಯಾತ್ಮ-ಸಂಜ್ಞಿತಮ್ ।
ಯತ್ತ್ವಯೋಕ್ತಂ ವಚಸ್ತೇನ / ಮೋಹೋಽಯಂ ವಿಗತೋ ಮಮ ॥ 1 ॥

ಭವಾಪ್ಯಯೌ ಹಿ ಭೂತಾನಾಂ / ಶ್ರುತೌ ವಿಸ್ತರಶೋ ಮಯಾ ।
ತ್ವತ್ತಃ ಕಮಲಪತ್ರಾಕ್ಷ / ಮಾಹಾತ್ಮ್ಯಮ್-ಅಪಿ ಚಾವ್ಯಯಮ್ ॥ 2 ॥

ಏವಮೇತದ್-ಯಥಾತ್ಥ ತ್ವಮ್ / ಆತ್ಮಾನಂ ಪರಮೇಶ್ವರ ।
ದ್ರಷ್ಟುಮಿಚ್ಛಾಮಿ ತೇ ರೂಪಮ್ / ಐಶ್ವರಂ ಪುರುಷೋತ್ತಮ ॥ 3 ॥

ಮನ್ಯಸೇ ಯದಿ ತಚ್ಛಕ್ಯಂ / ಮಯಾ ದ್ರಷ್ಟುಮಿತಿ ಪ್ರಭೋ ।
ಯೋಗೇಶ್ವರ ತತೋ ಮೇ ತ್ವಂ / ದರ್ಶಯಾತ್ಮಾನಮವ್ಯಯಮ್ ॥ 4 ॥

ಶ್ರೀಭಗವಾನುವಾಚ
ಪಶ್ಯ ಮೇ ಪಾರ್ಥ ರೂಪಾಣಿ / ಶತಶೋಽಥ ಸಹಸ್ರಶಃ ।
ನಾನಾವಿಧಾನಿ ದಿವ್ಯಾನಿ / ನಾನಾವರ್ಣಾ-ಕೃತೀನಿ ಚ ॥ 5 ॥

ಪಶ್ಯಾದಿತ್ಯಾನ್-ವಸೂನ್-ರುದ್ರಾನ್ / ಅಶ್ವಿನೌ ಮರುತಸ್-ತಥಾ

ಬಹೂನ್ಯದೃಷ್ಟ-ಪೂರ್ವಾಣಿ / ಪಶ್ಯಾಶ್ಚರ್ಯಾಣಿ ಭಾರತ ॥ 6 ॥

ಇಹೈಕಸ್ಥಂ ಜಗತ್-ಕೃತ್ಸ್ನಂ / ಪಶ್ಯಾದ್ಯ ಸಚರಾಚರಮ್ ।
ಮಮ ದೇಹೇ ಗುಡಾಕೇಶ / ಯಚ್ಚಾನ್ಯದ್-ದ್ರಷ್ಟುಮಿಚ್ಛಸಿ ॥ 7 ॥

ನ ತು ಮಾಂ ಶಕ್ಯಸೇ ದ್ರಷ್ಟುಮ್ / ಅನೇನೈವ ಸ್ವಚಕ್ಷುಷಾ ।
ದಿವ್ಯಂ ದದಾಮಿ ತೇ ಚಕ್ಷುಃ / ಪಶ್ಯ ಮೇ ಯೋಗಮೈಶ್ವರಮ್ ॥ 8 ॥

ಸಂಜಯ ಉವಾಚ
ಏವಮುಕ್ತ್ವಾ ತತೋ ರಾಜನ್ / ಮಹಾ-ಯೋಗೇಶ್ವರೋ ಹರಿಃ ।
ದರ್ಶಯಾಮಾಸ ಪಾರ್ಥಾಯ / ಪರಮಂ ರೂಪಮೈಶ್ವರಮ್ ॥ 9 ॥

ಅನೇಕ-ವಕ್ತ್ರನಯನಮ್ / ಅನೇಕಾದ್ಭುತ-ದರ್ಶನಮ್ ।
ಅನೇಕದಿವ್ಯಾಭರಣಂ / ದಿವ್ಯಾನೇಕೋದ್ಯತಾಯುಧಮ್ ॥ 10 ॥

ದಿವ್ಯಮಾಲ್ಯಾಂಬರಧರಂ / ದಿವ್ಯಗಂಧಾನುಲೇಪನಮ್ ।
ಸರ್ವಾಶ್ಚರ್ಯಮಯಂ ದೇವಮ್ / ಅನಂತಂ ವಿಶ್ವತೋಮುಖಮ್ ॥ 11 ॥

ದಿವಿ ಸೂರ್ಯಸಹಸ್ರಸ್ಯ / ಭವೇದ್-ಯುಗ-ಪದುತ್ಥಿತಾ ।
ಯದಿ ಭಾಃ ಸದೃಶೀ ಸಾ ಸ್ಯಾದ್ / ಭಾಸಸ್ತಸ್ಯ ಮಹಾತ್ಮನಃ ॥ 12 ॥

ತತ್ರೈಕಸ್ಥಂ ಜಗತ್-ಕೃತ್ಸ್ನಂ / ಪ್ರವಿಭಕ್ತಮ್-ಅನೇಕಧಾ ।
ಅಪಶ್ಯದ್-ದೇವದೇವಸ್ಯ / ಶರೀರೇ ಪಾಂಡವಸ್ತದಾ ॥ 13 ॥

ತತಃ ಸ ವಿಸ್ಮಯಾವಿಷ್ಟೋ / ಹೃಷ್ಟರೋಮಾ ಧನಂಜಯಃ ।
ಪ್ರಣಮ್ಯ ಶಿರಸಾ ದೇವಂ / ಕೃತಾಂಜಲಿರಭಾಷತ ॥ 14 ॥

ಅರ್ಜುನ ಉವಾಚ
ಪಶ್ಯಾಮಿ ದೇವಾಂಸ್ತವ ದೇವ ದೇಹೇ / ಸರ್ವಾಂಸ್ತಥಾ ಭೂತ-ವಿಶೇಷ-ಸಂಘಾನ್।
ಬ್ರಹ್ಮಾಣಮೀಶಂ ಕಮಲಾಸನಸ್ಥಮ್ / ಋಷೀಂಶ್ಚ ಸರ್ವಾನ್-ಉರಗಾಂಶ್ಚ ದಿವ್ಯಾನ್ ॥ 15 ॥

ಅನೇಕ-ಬಾಹೂದರ-ವಕ್ತ್ರನೇತ್ರಂ / ಪಶ್ಯಾಮಿ ತ್ವಾಂ ಸರ್ವತೋಽನಂತರೂಪಂ।
ನಾಂತಂ ನ ಮಧ್ಯಂ ನ ಪುನಸ್ತವಾದಿಂ / ಪಶ್ಯಾಮಿ ವಿಶ್ವೇಶ್ವರ ವಿಶ್ವರೂಪ ॥ 16 ॥

ಕಿರೀಟಿನಂ ಗದಿನಂ ಚಕ್ರಿಣಂ ಚ / ತೇಜೋರಾಶಿಂ ಸರ್ವತೋ ದೀಪ್ತಿಮಂತಂ।
ಪಶ್ಯಾಮಿ ತ್ವಾಂ ದುರ್ನಿರೀಕ್ಷ್ಯಂ ಸಮಂತಾದ್ / ದೀಪ್ತಾನಲಾರ್ಕ-ದ್ಯುತಿಮ್-ಅಪ್ರಮೇಯಮ್ ॥ 17 ॥

ತ್ವಮಕ್ಷರಂ ಪರಮಂ ವೇದಿತವ್ಯಂ / ತ್ವಮಸ್ಯ ವಿಶ್ವಸ್ಯ ಪರಂ ನಿಧಾನಂ।
ತ್ವಮವ್ಯಯಃ ಶಾಶ್ವತಧರ್ಮಗೋಪ್ತಾ / ಸನಾತನಸ್ತ್ವಂ ಪುರುಷೋ ಮತೋ ಮೇ ॥ 18 ॥

ಅನಾದಿಮಧ್ಯಾಂತಮ್-ಅನಂತ-ವೀರ್ಯಮ್ / ಅನಂತಬಾಹುಂ ಶಶಿ-ಸೂರ್ಯ-ನೇತ್ರಂ।

ಪಶ್ಯಾಮಿ ತ್ವಾಂ ದೀಪ್ತ-ಹುತಾಶ-ವಕ್ತ್ರಂ / ಸ್ವತೇಜಸಾ ವಿಶ್ವಮಿದಂ ತಪಂತಮ್ ॥ 19 ॥

ದ್ಯಾವಾ-ಪೃಥಿವ್ಯೋರ್-ಇದಮಂತರಂ ಹಿ / ವ್ಯಾಪ್ತಂ ತ್ವಯೈಕೇನ ದಿಶಶ್ಚ ಸರ್ವಾಃ।
ದೃಷ್ಟ್ವಾದ್ಭುತಂ ರೂಪಮುಗ್ರಂ ತವೇದಂ / ಲೋಕತ್ರಯಂ ಪ್ರವ್ಯಥಿತಂ ಮಹಾತ್ಮನ್ ॥ 20 ॥

ಅಮೀ ಹಿ ತ್ವಾಂ ಸುರಸಂಘಾ ವಿಶಂತಿ / ಕೇಚಿದ್-ಭೀತಾಃ ಪ್ರಾಂಜಲಯೋ ಗೃಣಂತಿ।
ಸ್ವಸ್ತೀತ್ಯುಕ್ತ್ವಾ ಮಹರ್ಷಿ-ಸಿದ್ಧಸಂಘಾಃ / ಸ್ತುವಂತಿ ತ್ವಾಂ ಸ್ತುತಿಭಿಃ ಪುಷ್ಕಲಾಭಿಃ ॥ 21 ॥

ರುದ್ರಾದಿತ್ಯಾ ವಸವೋ ಯೇ ಚ ಸಾಧ್ಯಾ / ವಿಶ್ವೇಽಶ್ವಿನೌ ಮರುತಶ್ಚೋಷ್ಮಪಾಶ್ಚ।
ಗಂಧರ್ವ-ಯಕ್ಷಾ-ಸುರ-ಸಿದ್ಧ-ಸಂಘಾಃ / ವೀಕ್ಷಂತೇ ತ್ವಾಂ ವಿಸ್ಮಿತಾಶ್ಚೈವ ಸರ್ವೇ ॥ 22 ॥

ರೂಪಂ ಮಹತ್ತೇ ಬಹು-ವಕ್ತ್ರ-ನೇತ್ರಂ / ಮಹಾಬಾಹೋ ಬಹು-ಬಾಹೂರು-ಪಾದಂ।
ಬಹೂದರಂ ಬಹು-ದಂಷ್ಟ್ರಾ-ಕರಾಲಂ / ದೃಷ್ಟ್ವಾ ಲೋಕಾಃ ಪ್ರವ್ಯಥಿತಾಸ್-ತಥಾಹಮ್ ॥ 23 ॥

ನಭಃ-ಸ್ಪೃಶಂ ದೀಪ್ತಮನೇಕವರ್ಣಂ / ವ್ಯಾತ್ತಾನನಂ ದೀಪ್ತ-ವಿಶಾಲ-ನೇತ್ರಂ।
ದೃಷ್ಟ್ವಾ ಹಿ ತ್ವಾಂ ಪ್ರವ್ಯಥಿತಾಂತರಾತ್ಮಾ / ಧೃತಿಂ ನ ವಿಂದಾಮಿ ಶಮಂ ಚ ವಿಷ್ಣೋ ॥ 24 ॥

ದಂಷ್ಟ್ರಾಕರಾಲಾನಿ ಚ ತೇ ಮುಖಾನಿ / ದೃಷ್ಟ್ವೈವ ಕಾಲಾನಲಸಂನಿಭಾನಿ।
ದಿಶೋ ನ ಜಾನೇ ನ ಲಭೇ ಚ ಶರ್ಮ / ಪ್ರಸೀದ ದೇವೇಶ ಜಗನ್ನಿವಾಸ ॥ 25 ॥

ಅಮೀ ಚ ತ್ವಾಂ ಧೃತರಾಷ್ಟ್ರಸ್ಯ ಪುತ್ರಾಃ / ಸರ್ವೇ ಸಹೈವಾವನಿಪಾಲ-ಸಂಘೈಃ।
ಭೀಷ್ಮೋ ದ್ರೋಣಃ ಸೂತಪುತ್ರಸ್ತಥಾಸೌ / ಸಹಾಸ್ಮದೀಯೈರಪಿ ಯೋಧಮುಖ್ಯೈಃ ॥ 26 ॥

ವಕ್ತ್ರಾಣಿ ತೇ ತ್ವರಮಾಣಾ ವಿಶಂತಿ / ದಂಷ್ಟ್ರಾಕರಾಲಾನಿ ಭಯಾನಕಾನಿ।
ಕೇಚಿದ್ವಿಲಗ್ನಾ ದಶನಾಂತರೇಷು / ಸಂದೃಶ್ಯಂತೇ ಚೂರ್ಣಿತೈರ್-ಉತ್ತಮಾಂಗೈಃ ॥ 27 ॥

ಯಥಾ ನದೀನಾಂ ಬಹವೋಽಂಬುವೇಗಾಃ / ಸಮುದ್ರಮೇವಾಭಿಮುಖಾ ದ್ರವಂತಿ।
ತಥಾ ತವಾಮೀ ನರಲೋಕವೀರಾ / ವಿಶಂತಿ ವಕ್ತ್ರಾಣ್ಯಭಿವಿಜ್ವಲಂತಿ ॥ 28 ॥

ಯಥಾ ಪ್ರದೀಪ್ತಂ ಜ್ವಲನಂ ಪತಂಗಾ / ವಿಶಂತಿ ನಾಶಾಯ ಸಮೃದ್ಧವೇಗಾಃ।
ತಥೈವ ನಾಶಾಯ ವಿಶಂತಿ ಲೋಕಾಃ / ತವಾಪಿ ವಕ್ತ್ರಾಣಿ ಸಮೃದ್ಧವೇಗಾಃ ॥ 29 ॥

ಲೇಲಿಹ್ಯಸೇ ಗ್ರಸಮಾನಃ ಸಮಂತಾತ್ / ಲೋಕಾನ್-ಸಮಗ್ರಾನ್- ವದನೈರ್-ಜ್ವಲದ್ಭಿಃ ।

ತೇಜೋಭಿರಾಪೂರ್ಯ ಜಗತ್-ಸಮಗ್ರಂ / ಭಾಸಸ್ತವೋಗ್ರಾಃ ಪ್ರತಪಂತಿ ವಿಷ್ಣೋ ॥ 30 ॥

ಆಖ್ಯಾಹಿ ಮೇ ಕೋ ಭವಾನ್-ಉಗ್ರರೂಪೋ / ನಮೋಽಸ್ತು ತೇ ದೇವವರ ಪ್ರಸೀದ।
ವಿಜ್ಞಾತುಮಿಚ್ಛಾಮಿ ಭವಂತಮಾದ್ಯಂ / ನ ಹಿ ಪ್ರಜಾನಾಮಿ ತವ ಪ್ರವೃತ್ತಿಮ್ ॥ 31 ॥

ಶ್ರೀಭಗವಾನುವಾಚ
ಕಾಲೋಽಸ್ಮಿ ಲೋಕಕ್ಷಯಕೃತ್-ಪ್ರವೃದ್ಧೋ / ಲೋಕಾನ್-ಸಮಾಹರ್ತುಮ್-ಇಹ ಪ್ರವೃತ್ತಃ।
ಋತೇಽಪಿ ತ್ವಾಂ ನ ಭವಿಷ್ಯಂತಿ ಸರ್ವೇ / ಯೇಽವಸ್ಥಿತಾಃ ಪ್ರತ್ಯನೀಕೇಷು ಯೋಧಾಃ ॥ 32 ॥

ತಸ್ಮಾತ್-ತ್ವಮುತ್ತಿಷ್ಠ ಯಶೋ ಲಭಸ್ವ / ಜಿತ್ವಾ ಶತ್ರೂನ್-ಭುಂಕ್ಷ್ಯ  ರಾಜ್ಯಂ ಸಮೃದ್ಧಂ।
ಮಯೈವೈತೇ ನಿಹತಾಃ ಪೂರ್ವಮೇವ / ನಿಮಿತ್ತಮಾತ್ರಂ ಭವ ಸವ್ಯಸಾಚಿನ್ ॥ 33 ॥

ದ್ರೋಣಂ ಚ ಭೀಷ್ಮಂ ಚ ಜಯದ್ರಥಂ ಚ / ಕರ್ಣಂ ತಥಾನ್ಯಾನಪಿ ಯೋಧವೀರಾನ್।
ಮಯಾ ಹತಾಂಸ್ತ್ವಂ ಜಹಿ ಮಾ ವ್ಯಥಿಷ್ಠಾ / ಯುಧ್ಯಸ್ವ ಜೇತಾಸಿ ರಣೇ ಸಪತ್ನಾನ್ ॥ 34 ॥

ಸಂಜಯ ಉವಾಚ
ಏತತ್-ಶ್ರುತ್ವಾ ವಚನಂ ಕೇಶವಸ್ಯ / ಕೃತಾಂಜಲಿರ್-ವೇಪಮಾನಃ ಕಿರೀಟೀ।
ನಮಸ್ಕೃತ್ವಾ ಭೂಯ ಏವಾಹ ಕೃಷ್ಣಂ / ಸಗದ್ಗದಂ ಭೀತಭೀತಃ ಪ್ರಣಮ್ಯ ॥ 35 ॥

ಅರ್ಜುನ ಉವಾಚ
ಸ್ಥಾನೇ ಹೃಷೀಕೇಶ ತವ ಪ್ರಕೀರ್ತ್ಯಾ / ಜಗತ್-ಪ್ರಹೃಷ್ಯತಿ-ಅನುರಜ್ಯತೇ ಚ ।
ರಕ್ಷಾಂಸಿ ಭೀತಾನಿ ದಿಶೋ ದ್ರವಂತಿ / ಸರ್ವೇ ನಮಸ್ಯಂತಿ ಚ ಸಿದ್ಧ-ಸಂಘಾಃ ॥ 36 ॥

ಕಸ್ಮಾತ್-ಚ ತೇ ನ ನಮೇರನ್-ಮಹಾತ್ಮನ್ / ಗರೀಯಸೇ ಬ್ರಹ್ಮಣೋಽಪ್ಯಾದಿಕರ್ತ್ರೆ
ಅನಂತ ದೇವೇಶ ಜಗನ್ನಿವಾಸ / ತ್ವಮಕ್ಷರಂ ಸದಸತ್-ತತ್ಪರಂ ಯತ್ ॥ 37 ॥

ತ್ವಮಾದಿದೇವಃ ಪುರುಷಃ ಪುರಾಣಃ / ತ್ವಮಸ್ಯ ವಿಶ್ವಸ್ಯ ಪರಂ ನಿಧಾನಂ।
ವೇತ್ತಾಸಿ ವೇದ್ಯಂ ಚ ಪರಂ ಚ ಧಾಮ / ತ್ವಯಾ ತತಂ ವಿಶ್ವಮನಂತರೂಪ ॥ 38 ॥

ವಾಯುರ್-ಯಮೋಽಗ್ನಿರ್-ವರುಣಃ ಶಶಾಂಕಃ / ಪ್ರಜಾಪತಿಸ್ತ್ವಂ ಪ್ರ-ಪಿತಾಮಹಶ್ಚ।
ನಮೋ ನಮಸ್ತೇಽಸ್ತು ಸಹಸ್ರಕೃತ್ವಃ / ಪುನಶ್ಚ ಭೂಯೋಽಪಿ ನಮೋ ನಮಸ್ತೇ ॥ 39 ॥

ನಮಃ ಪುರಸ್ತಾದಥ ಪೃಷ್ಠತಸ್ತೇ / ನಮೋಽಸ್ತು ತೇ ಸರ್ವತ ಏವ ಸರ್ವ |
ಅನಂತ-ವೀರ್ಯಾಮಿತ-ವಿಕ್ರಮಸ್ತ್ವಂ / ಸರ್ವಂ ಸಮಾಪ್ನೋಷಿ ತತೋಽಸಿ ಸರ್ವಃ ॥ 40 ॥

ಸಖೇತಿ ಮತ್ವಾ ಪ್ರಸಭಂ ಯದುಕ್ತಂ / ಹೇ ಕೃಷ್ಣ ಹೇ ಯಾದವ ಹೇ ಸಖೇತಿ।
ಅಜಾನತಾ ಮಹಿಮಾನಂ ತವೇದಂ / ಮಯಾ ಪ್ರಮಾದಾತ್-ಪ್ರಣಯೇನ ವಾಪಿ ॥ 41 ॥

ಯಚ್ಚಾವಹಾಸಾರ್ಥಮ್-ಅಸತ್-ಕೃತೋಽಸಿ / ವಿಹಾರ-ಶಯ್ಯಾಸನ-ಭೋಜನೇಷು।
ಏಕೋಽಥವಾಪ್ಯಚ್ಯುತ ತತ್-ಸಮಕ್ಷಂ / ತತ್-ಕ್ಷಾಮಯೇ ತ್ವಾಮಹಮ್-ಅಪ್ರಮೇಯಮ್ ॥ 42 ॥

ಪಿತಾಸಿ ಲೋಕಸ್ಯ ಚರಾಚರಸ್ಯ / ತ್ವಮಸ್ಯ ಪೂಜ್ಯಶ್ಚ ಗುರುರ್ಗರೀಯಾನ್।
ನ ತ್ವತ್ಸಮೋಽಸ್ತ್ಯಭ್ಯಧಿಕಃ ಕುತೋಽನ್ಯೋ / ಲೋಕ-ತ್ರಯೇಽಪ್ಯಪ್ರತಿಮ-ಪ್ರಭಾವ ॥ 43 ॥

ತಸ್ಮಾತ್-ಪ್ರಣಮ್ಯ ಪ್ರಣಿಧಾಯ ಕಾಯಂ / ಪ್ರಸಾದಯೇ ತ್ವಾಮ್-ಅಹಮೀಶಮೀಡ್ಯಂ।
ಪಿತೇವ ಪುತ್ರಸ್ಯ ಸಖೇವ ಸಖ್ಯುಃ / ಪ್ರಿಯಃ ಪ್ರಿಯಾಯಾರ್ಹಸಿ ದೇವ ಸೋಢುಮ್ ॥ 44 ॥

ಅದೃಷ್ಟಪೂರ್ವಂ ಹೃಷಿತೋಽಸ್ಮಿ ದೃಷ್ಟ್ವಾ / ಭಯೇನ ಚ ಪ್ರವ್ಯಥಿತಂ ಮನೋ ಮೇ।
ತದೇವ ಮೇ ದರ್ಶಯ ದೇವರೂಪಂ / ಪ್ರಸೀದ ದೇವೇಶ ಜಗನ್ನಿವಾಸ ॥ 45 ॥

ಕಿರೀಟಿನಂ ಗದಿನಂ ಚಕ್ರಹಸ್ತಮ್ / ಇಚ್ಛಾಮಿ ತ್ವಾಂ ದ್ರಷ್ಟುಮಹಂ ತಥೈವ।
ತೇನೈವ ರೂಪೇಣ ಚತುರ್ಭುಜೇನ / ಸಹಸ್ರಬಾಹೋ ಭವ ವಿಶ್ವಮೂರ್ತೇ ॥ 46 ॥

ಶ್ರೀ ಭಗವಾನುವಾಚ
ಮಯಾ ಪ್ರಸನ್ನೇನ ತವಾರ್ಜುನೇದಂ / ರೂಪಂ ಪರಂ ದರ್ಶಿತಮಾತ್ಮ-ಯೋಗಾತ್।
ತೇಜೋಮಯಂ ವಿಶ್ವಮನಂತಮಾದ್ಯಂ / ಯನ್ಮೇ ತ್ವದನ್ಯೇನ ನ ದೃಷ್ಟಪೂರ್ವಮ್ ॥ 47 ॥

ನ ವೇದ-ಯಜ್ಞಾದ್-ಯನೈರ್-ನ ದಾನೈರ್ -/ ನ ಚ ಕ್ರಿಯಾಭಿರ್ ನ ತಪೋಭಿರ್-ಉಗ್ರೈಃ ।
ಏವಂರೂಪಃ ಶಕ್ಯ ಅಹಂ ನೃಲೋಕೇ / ದ್ರಷ್ಟುಂ ತ್ವದನ್ಯೇನ ಕುರುಪ್ರವೀರ ॥ 48 ॥

ಮಾ ತೇ ವ್ಯಥಾ ಮಾ ಚ ವಿಮೂಢ-ಭಾವೋ / ದೃಷ್ಟ್ವಾ ರೂಪಂ ಘೋರಮೀದೃನ್-ಮಮೇದಂ।
ವ್ಯಪೇತಭೀಃ ಪ್ರೀತಮನಾಃ ಪುನಸ್ತ್ವಂ / ತದೇವ ಮೇ ರೂಪಮಿದಂ ಪ್ರಪಶ್ಯ ॥ 49 ॥

ಸಂಜಯ ಉವಾಚ
ಇತ್ಯರ್ಜುನಂ ವಾಸುದೇವಸ್-ತಥೋಕ್ತ್ವಾ  / ಸ್ವಕಂ ರೂಪಂ ದರ್ಶಯಾಮಾಸ ಭೂಯಃ।
ಆಶ್ವಾಸಯಾಮಾಸ ಚ ಭೀತಮೇನಂ / ಭೂತ್ವಾ ಪುನಃ ಸೌಮ್ಯವಪುರ್-ಮಹಾತ್ಮಾ ॥ 50 ॥

ಅರ್ಜುನ ಉವಾಚ
ದೃಷ್ಟ್ವೇದಂ ಮಾನುಷಂ ರೂಪಂ / ತವ ಸೌಮ್ಯಂ ಜನಾರ್ದನ ।
ಇದಾನೀಮಸ್ಮಿ ಸಂವೃತ್ತಃ / ಸಚೇತಾಃ ಪ್ರಕೃತಿಂ ಗತಃ ॥ 51 ॥

ಶ್ರೀಭಗವಾನುವಾಚ
ಸುದುರ್ದರ್ಶಮಿದಂ ರೂಪಂ / ದೃಷ್ಟವಾನಸಿ ಯನ್ಮಮ ।
ದೇವಾ ಅಪ್ಯಸ್ಯ ರೂಪಸ್ಯ / ನಿತ್ಯಂ ದರ್ಶನ-ಕಾಂಕ್ಷಿಣಃ ॥ 52 ॥

ನಾಹಂ ವೇದೈರ್-ನ ತಪಸಾ / ನ ದಾನೇನ ನ ಚೇಜ್ಯಯಾ ।
ಶಕ್ಯ ಏವಂವಿಧೋ ದ್ರಷ್ಟುಂ / ದೃಷ್ಟವಾನಸಿ ಮಾಂ ಯಥಾ ॥ 53 ॥

ಭಕ್ತ್ಯಾ ತ್ವನನ್ಯಯಾ ಶಕ್ಯ / ಅಹಮೇವಂ-ವಿಧೋಽರ್ಜುನ ।
ಜ್ಞಾತುಂ ದ್ರಷ್ಟುಂ ಚ ತತ್ತ್ವೇನ / ಪ್ರವೇಷ್ಟುಂ ಚ ಪರಂತಪ ॥ 54 ॥

ಮತ್-ಕರ್ಮ-ಕೃನ್-ಮತ್-ಪರಮೋ / ಮದ್ಭಕ್ತಃ ಸಂಗವರ್ಜಿತಃ ।
ನಿರ್ವೈರಃ ಸರ್ವಭೂತೇಷು / ಯಃ ಸ ಮಾಮೇತಿ ಪಾಂಡವ ॥ 55 ॥

ಓಂ ತತ್ಸದಿತಿ ಶ್ರೀಮದ್ಭಗವದ್ಗೀತಾಸು ಉಪನಿಷತ್ಸು ಬ್ರಹ್ಮವಿದ್ಯಾಯಾಂ ಯೋಗಶಾಸ್ತ್ರೇ
ಶ್ರೀಕೃಷ್ಣಾರ್ಜುನಸಂವಾದೇ ವಿಶ್ವರೂಪದರ್ಶನಯೋಗೋ ನಾಮೈಕಾದಶೋಽಧ್ಯಾಯಃ ॥11 ॥