Gita - Easy Chanting - Chapter 10

ಶ್ರೀಮದ್ಭಗವದ್ಗೀತಾ ಮೂಲಂ - ದಶಮೋಽಧ್ಯಾಯಃ

ಓಂ ಶ್ರೀಪರಮಾತ್ಮನೇ ನಮಃ
ಅಥ ದಶಮೋಽಧ್ಯಾಯಃ ।
ವಿಭೂತಿಯೋಗಃ

ಶ್ರೀಭಗವಾನುವಾಚ
ಭೂಯ ಏವ ಮಹಾಬಾಹೋ / ಶೃಣು ಮೇ ಪರಮಂ ವಚಃ ।

ಯತ್ತೇಽಹಂ ಪ್ರೀಯಮಾಣಾಯ / ವಕ್ಷ್ಯಾಮಿ ಹಿತಕಾಮ್ಯಯಾ ॥ 1 ॥

ನ ಮೇ ವಿದುಃ ಸುರಗಣಾಃ / ಪ್ರಭವಂ ನ ಮಹರ್ಷಯಃ ।
ಅಹಮಾದಿರ್ಹಿ ದೇವಾನಾಂ / ಮಹರ್ಷೀಣಾಂ ಚ ಸರ್ವಶಃ ॥ 2 ॥

ಯೋ ಮಾಮ್-ಅಜಮ್-ಅನಾದಿಂ ಚ / ವೇತ್ತಿ ಲೋಕ-ಮಹೇಶ್ವರಮ್ ।
ಅಸಂಮೂಢಃ ಸ ಮರ್ತ್ಯೇಷು / ಸರ್ವಪಾಪೈಃ ಪ್ರಮುಚ್ಯತೇ ॥ 3 ॥

ಬುದ್ಧಿರ್-ಜ್ಙಾನಮ್-ಅಸಂಮೋಹಃ / ಕ್ಷಮಾ ಸತ್ಯಂ ದಮಃ ಶಮಃ ।
ಸುಖಂ ದುಃಖಂ ಭವೋಽಭಾವೋ / ಭಯಂ ಚಾಭಯಮೇವ ಚ ॥ 4 ॥

ಅಹಿಂಸಾ ಸಮತಾ-ತುಷ್ಟಿಃ / ತಪೋ ದಾನಂ ಯಶೋಽಯಶಃ ।
ಭವಂತಿ ಭಾವಾ ಭೂತಾನಾಂ / ಮತ್ತ ಏವ ಪೃಥಗ್ವಿಧಾಃ ॥ 5 ॥

ಮಹರ್ಷಯಃ ಸಪ್ತ ಪೂರ್ವೇ / ಚತ್ವಾರೋ ಮನವಸ್ತಥಾ ।
ಮದ್ಭಾವಾ ಮಾನಸಾ ಜಾತಾ / ಯೇಷಾಂ ಲೋಕ ಇಮಾಃ ಪ್ರಜಾಃ ॥ 6 ॥

ಏತಾಂ ವಿಭೂತಿಂ ಯೋಗಂ ಚ / ಮಮ ಯೋ ವೇತ್ತಿ ತತ್ತ್ವತಃ ।
ಸೋಽವಿಕಂಪೇನ ಯೋಗೇನ / ಯುಜ್ಯತೇ ನಾತ್ರ ಸಂಶಯಃ ॥ 7 ॥

ಅಹಂ ಸರ್ವಸ್ಯ ಪ್ರಭವೋ / ಮತ್ತಃ ಸರ್ವಂ ಪ್ರವರ್ತತೇ ।
ಇತಿ ಮತ್ವಾ ಭಜಂತೇ ಮಾಂ / ಬುಧಾ ಭಾವಸಮನ್ವಿತಾಃ ॥ 8 ॥

ಮಚ್ಚಿತ್ತಾ ಮದ್ಗತಪ್ರಾಣಾ / ಬೋಧಯಂತಃ ಪರಸ್ಪರಮ್ ।
ಕಥಯಂತಶ್ಚ ಮಾಂ ನಿತ್ಯಂ / ತುಷ್ಯಂತಿ ಚ ರಮಂತಿ ಚ ॥ 9 ॥

ತೇಷಾಂ ಸತತಯುಕ್ತಾನಾಂ / ಭಜತಾಂ ಪ್ರೀತಿಪೂರ್ವಕಮ್ ।
ದದಾಮಿ ಬುದ್ಧಿಯೋಗಂ ತಂ / ಯೇನ ಮಾಮ್-ಉಪಯಾಂತಿ ತೇ ॥ 10 ॥

ತೇಷಾಮ್-ಏವಾನುಕಂಪಾರ್ಥಮ್ / ಅಹಮ್-ಅಜ್ಞಾನಜಂ ತಮಃ ।
ನಾಶಯಾಮ್ಯಾತ್ಮಭಾವಸ್ಥೋ / ಜ್ಞಾನದೀಪೇನ ಭಾಸ್ವತಾ ॥ 11 ॥

ಅರ್ಜುನ ಉವಾಚ
ಪರಂ ಬ್ರಹ್ಮ ಪರಂ ಧಾಮ / ಪವಿತ್ರಂ ಪರಮಂ ಭವಾನ್ ।
ಪುರುಷಂ ಶಾಶ್ವತಂ ದಿವ್ಯಮ್ / ಆದಿದೇವಮ್-ಅಜಂ ವಿಭುಮ್ ॥ 12 ॥

ಆಹುಸ್-ತ್ವಾಮ್-ಋಷಯಃ ಸರ್ವೇ / ದೇವರ್ಷಿರ್-ರ್ನಾರದಸ್-ತಥಾ ।
ಅಸಿತೋ ದೇವಲೋ ವ್ಯಾಸಃ / ಸ್ವಯಂ ಚೈವ ಬ್ರವೀಷಿ ಮೇ ॥ 13 ॥

ಸರ್ವಮೇತದ್-ಋತಂ ಮನ್ಯೇ / ಯನ್ಮಾಂ ವದಸಿ ಕೇಶವ ।
ನ ಹಿ ತೇ ಭಗವನ್-ವ್ಯಕ್ತಿಂ / ವಿದುರ್-ದೇವಾ ನ ದಾನವಾಃ ॥ 14 ॥

ಸ್ವಯಮ್-ಏವಾತ್ಮನಾತ್ಮಾನಂ / ವೇತ್ಥ ತ್ವಂ ಪುರುಷೋತ್ತಮ ।
ಭೂತಭಾವನ ಭೂತೇಶ / ದೇವದೇವ ಜಗತ್ಪತೇ ॥ 15 ॥

ವಕ್ತುಮರ್ಹಸ್ಯಶೇಷೇಣ / ದಿವ್ಯಾ ಹ್ಯಾತ್ಮ-ವಿಭೂತಯಃ ।
ಯಾಭಿರ್-ವಿಭೂತಿಭಿರ್-ಲೋಕಾನ್ / ಇಮಾಂಸ್ತ್ವಂ ವ್ಯಾಪ್ಯ ತಿಷ್ಠಸಿ ॥ 16 ॥

ಕಥಂ ವಿದ್ಯಾಮಹಂ ಯೋಗಿಂಸ್ / ತ್ವಾಂ ಸದಾ ಪರಿಚಿಂತಯನ್ ।
ಕೇಷು ಕೇಷು ಚ ಭಾವೇಷು / ಚಿಂತ್ಯೋಽಸಿ ಭಗವನ್ಮಯಾ ॥ 17 ॥

ವಿಸ್ತರೇಣಾತ್ಮನೋ ಯೋಗಂ / ವಿಭೂತಿಂ ಚ ಜನಾರ್ದನ ।
ಭೂಯಃ ಕಥಯ ತೃಪ್ತಿರ್ಹಿ / ಶೃಣ್ವತೋ ನಾಸ್ತಿ ಮೇಽಮೃತಮ್ ॥ 18 ॥

ಶ್ರೀಭಗವಾನುವಾಚ
ಹಂತ ತೇ ಕಥಯಿಷ್ಯಾಮಿ / ದಿವ್ಯಾ ಹ್ಯಾತ್ಮ-ವಿಭೂತಯಃ ।
ಪ್ರಾಧಾನ್ಯತಃ ಕುರುಶ್ರೇಷ್ಠ / ನಾಸ್ತ್ಯಂತೋ ವಿಸ್ತರಸ್ಯ ಮೇ ॥ 19 ॥

ಅಹಮಾತ್ಮಾ ಗುಡಾಕೇಶ / ಸರ್ವ-ಭೂತಾಶಯ-ಸ್ಥಿತಃ ।
ಅಹಮಾದಿಶ್ಚ ಮಧ್ಯಂ ಚ / ಭೂತಾನಾಮಂತ ಏವ ಚ ॥ 20 ॥

ಆದಿತ್ಯಾನಾಮಹಂ ವಿಷ್ಣುರ್ / ಜ್ಯೋತಿಷಾಂ ರವಿರಂಶುಮಾನ್ ।
ಮರೀಚಿರ್-ಮರುತಾಮಸ್ಮಿ / ನಕ್ಷತ್ರಾಣಾಮ್-ಅಹಂ ಶಶೀ ॥ 21 ॥

ವೇದಾನಾಂ ಸಾಮವೇದೋಽಸ್ಮಿ / ದೇವಾನಾಮಸ್ಮಿ ವಾಸವಃ ।
ಇಂದ್ರಿಯಾಣಾಂ ಮನಶ್ಚಾಸ್ಮಿ / ಭೂತಾನಾಮಸ್ಮಿ ಚೇತನಾ ॥ 22 ॥

ರುದ್ರಾಣಾಂ ಶಂಕರಶ್ಚಾಸ್ಮಿ / ವಿತ್ತೇಶೋ ಯಕ್ಷರಕ್ಷಸಾಮ್ ।
ವಸೂನಾಂ ಪಾವಕಶ್ಚಾಸ್ಮಿ / ಮೇರುಃ ಶಿಖರಿಣಾಮಹಮ್ ॥ 23 ॥

ಪುರೋಧಸಾಂ ಚ ಮುಖ್ಯಂ ಮಾಂ / ವಿದ್ಧಿ ಪಾರ್ಥ ಬೃಹಸ್ಪತಿಮ್ ।
ಸೇನಾನೀನಾಮಹಂ ಸ್ಕಂದಃ / ಸರಸಾಮಸ್ಮಿ ಸಾಗರಃ ॥ 24 ॥

ಮಹರ್ಷೀಣಾಂ ಭೃಗುರಹಂ / ಗಿರಾಮ್-ಅಸ್ಮ್ಯೇಕಮ್-ಅಕ್ಷರಮ್ ।
ಯಜ್ಞಾನಾಂ ಜಪಯಜ್ಞೋಽಸ್ಮಿ / ಸ್ಥಾವರಾಣಾಂ ಹಿಮಾಲಯಃ ॥ 25 ॥

ಅಶ್ವತ್ಥಃ ಸರ್ವವೃಕ್ಷಾಣಾಂ / ದೇವರ್ಷೀಣಾಂ ಚ ನಾರದಃ ।
ಗಂಧರ್ವಾಣಾಂ ಚಿತ್ರರಥಃ / ಸಿದ್ಧಾನಾಂ ಕಪಿಲೋ ಮುನಿಃ ॥ 26 ॥

ಉಚ್ಚೈಃ-ಶ್ರವಸಮ್-ಅಶ್ವಾನಾಂ / ವಿದ್ಧಿ ಮಾಮ್-ಅಮೃತೋದ್ಭವಮ್ ।
ಐರಾವತಂ ಗಜೇಂದ್ರಾಣಾಂ / ನರಾಣಾಂ ಚ ನರಾಧಿಪಮ್ ॥ 27 ॥

ಆಯುಧಾನಾಮಹಂ ವಜ್ರಂ / ಧೇನೂನಾಮ್-ಅಸ್ಮಿ ಕಾಮ-ಧುಕ್ ।
ಪ್ರಜನಶ್ಚಾಸ್ಮಿ ಕಂದರ್ಪಃ / ಸರ್ಪಾಣಾಮ್-ಅಸ್ಮಿ ವಾಸುಕಿಃ ॥ 28 ॥

ಅನಂತಶ್ಚಾಸ್ಮಿ ನಾಗಾನಾಂ / ವರುಣೋ ಯಾದಸಾಮ್-ಅಹಮ್ ।
ಪಿತೄಣಾಮ್-ಅರ್ಯಮಾ ಚಾಸ್ಮಿ / ಯಮಃ ಸಂಯಮತಾಮ್-ಅಹಮ್ ॥ 29 ॥

ಪ್ರಹ್ಲಾದಶ್ಚಾಸ್ಮಿ ದೈತ್ಯಾನಾಂ / ಕಾಲಃ ಕಲಯತಾಮ್-ಅಹಮ್ ।
ಮೃಗಾಣಾಂ ಚ ಮೃಗೇಂದ್ರೋಽಹಂ / ವೈನತೇಯಶ್ಚ ಪಕ್ಷಿಣಾಮ್ ॥ 30 ॥

ಪವನಃ ಪವತಾಮಸ್ಮಿ / ರಾಮಃ ಶಸ್ತ್ರಭೃತಾಮ್-ಅಹಮ್ ।
ಝಷಾಣಾಂ ಮಕರಶ್ಚಾಸ್ಮಿ / ಸ್ರೋತಸಾಮಸ್ಮಿ ಜಾಹ್ನವೀ ॥ 31 ॥

ಸರ್ಗಾಣಾಮಾದಿರಂತಶ್ಚ / ಮಧ್ಯಂ ಚೈವಾಹಮ್-ಅರ್ಜುನ ।
ಅಧ್ಯಾತ್ಮವಿದ್ಯಾ ವಿದ್ಯಾನಾಂ / ವಾದಃ ಪ್ರವದತಾಮ್-ಅಹಮ್ ॥ 32 ॥

ಅಕ್ಷರಾಣಾಮ್-ಅಕಾರೋಽಸ್ಮಿ / ದ್ವಂದ್ವಃ ಸಾಮಾಸಿಕಸ್ಯ ಚ ।
ಅಹಮೇವಾಕ್ಷಯಃ ಕಾಲೋ / ಧಾತಾಹಂ ವಿಶ್ವತೋಮುಖಃ ॥ 33 ॥

ಮೃತ್ಯುಃ ಸರ್ವಹರಶ್ಚಾಹಮ್ / ಉದ್ಭವಶ್ಚ ಭವಿಷ್ಯತಾಮ್ ।
ಕೀರ್ತಿಃ ಶ್ರೀರ್ವಾಕ್ಚ ನಾರೀಣಾಂ / ಸ್ಮೃತಿರ್ಮೇಧಾ ಧೃತಿಃ ಕ್ಷಮಾ ॥ 34 ॥

ಬೃಹತ್ಸಾಮ ತಥಾ ಸಾಮ್ನಾಂ / ಗಾಯತ್ರೀ ಛಂದಸಾಮಹಮ್ ।
ಮಾಸಾನಾಂ ಮಾರ್ಗಶೀರ್ಷೋಽಹಮ್ / ಋತೂನಾಂ ಕುಸುಮಾಕರಃ ॥ 35 ॥

ದ್ಯೂತಂ ಛಲಯತಾಮಸ್ಮಿ / ತೇಜಸ್-ತೇಜಸ್ವಿನಾಮ್-ಅಹಮ್ ।
ಜಯೋಽಸ್ಮಿ ವ್ಯವಸಾಯೋಽಸ್ಮಿ / ಸತ್ತ್ವಂ ಸತ್ತ್ವವತಾಮ್-ಅಹಮ್ ॥ 36 ॥

ವೃಷ್ಣೀನಾಂ ವಾಸುದೇವೋಽಸ್ಮಿ / ಪಾಂಡವಾನಾಂ ಧನಂಜಯಃ ।
ಮುನೀನಾಮ್-ಅಪ್ಯಹಂ ವ್ಯಾಸಃ / ಕವೀನಾಮ್-ಉಶನಾ ಕವಿಃ ॥ 37 ॥

ದಂಡೋ ದಮಯತಾಮ್-ಅಸ್ಮಿ / ನೀತಿರಸ್ಮಿ ಜಿಗೀಷತಾಮ್ ।
ಮೌನಂ ಚೈವಾಸ್ಮಿ ಗುಹ್ಯಾನಾಂ / ಜ್ಞಾನಂ ಜ್ಞಾನವತಾಮ್-ಅಹಮ್ ॥ 38 ॥

ಯಚ್ಚಾಪಿ ಸರ್ವಭೂತಾನಾಂ / ಬೀಜಂ ತದಹಮರ್ಜುನ ।
ನ ತದಸ್ತಿ ವಿನಾ ಯತ್ಸ್ಯಾತ್ / ಮಯಾ ಭೂತಂ ಚರಾಚರಮ್ ॥ 39 ॥

ನಾಂತೋಽಸ್ತಿ ಮಮ ದಿವ್ಯಾನಾಂ / ವಿಭೂತೀನಾಂ ಪರಂತಪ ।
ಏಷ ತೂದ್ದೇಶತಃ ಪ್ರೋಕ್ತೋ / ವಿಭೂತೇರ್-ವಿಸ್ತರೋ ಮಯಾ ॥ 40 ॥

ಯದ್ಯದ್-ವಿಭೂತಿಮತ್-ಸತ್ತ್ವಂ / ಶ್ರೀಮದ್-ಊರ್ಜಿತಮೇವ ವಾ ।

ತತ್ತದೇವಾವಗಚ್ಛ ತ್ವಂ / ಮಮ ತೇಜೋಂಽಶಸಂಭವಮ್ ॥ 41 ॥

ಅಥವಾ ಬಹುನೈತೇನ / ಕಿಂ ಜ್ಞಾತೇನ ತವಾರ್ಜುನ ।
ವಿಷ್ಟಭ್ಯಾಹಮಿದಂ ಕೃತ್ಸ್ನಮ್ / ಏಕಾಂಶೇನ ಸ್ಥಿತೋ ಜಗತ್ ॥ 42 ॥

ಓಂ ತತ್ಸದಿತಿ ಶ್ರೀಮದ್ಭಗವದ್ಗೀತಾಸು ಉಪನಿಷತ್ಸು ಬ್ರಹ್ಮವಿದ್ಯಾಯಾಂ ಯೋಗಶಾಸ್ತ್ರೇ
ಶ್ರೀಕೃಷ್ಣಾರ್ಜುನಸಂವಾದೇ ವಿಭೂತಿಯೋಗೋ ನಾಮ ದಶಮೋಽಧ್ಯಾಯಃ ॥10 ॥