Gita - Easy Chanting - Chapter 12

ಶ್ರೀಮದ್ಭಗವದ್ಗೀತಾ ಮೂಲಂ - ದ್ವಾದಶೋಽಧ್ಯಾಯಃ
ಓಂ ಶ್ರೀ ಪರಮಾತ್ಮನೇ ನಮಃ
ಅಥ ದ್ವಾದಶೋಽಧ್ಯಾಯಃ ।
ಭಕ್ತಿಯೋಗಃ

ಅರ್ಜುನ ಉವಾಚ
ಏವಂ ಸತತಯುಕ್ತಾ ಯೇ / ಭಕ್ತಾಸ್-ತ್ವಾಂ ಪರ್ಯುಪಾಸತೇ ।
ಯೇ ಚಾಪ್ಯಕ್ಷರಮವ್ಯಕ್ತಂ / ತೇಷಾಂ ಕೇ ಯೋಗವಿತ್ತಮಾಃ ॥ 1 ॥

ಶ್ರೀಭಗವಾನುವಾಚ
ಮಯ್ಯಾವೇಶ್ಯ ಮನೋ ಯೇ ಮಾಂ / ನಿತ್ಯಯುಕ್ತಾ ಉಪಾಸತೇ ।
ಶ್ರದ್ಧಯಾ ಪರಯೋಪೇತಾತಾಃ / ತೇ ಮೇ ಯುಕ್ತತಮಾ ಮತಾಃ ॥ 2 ॥

ಯೇ ತ್ವಕ್ಷರಮ್-ಅನಿರ್ದೇಶ್ಯಮ್ / ಅವ್ಯಕ್ತಂ ಪರ್ಯುಪಾಸತೇ ।
ಸರ್ವತ್ರಗಮಚಿಂತ್ಯಂ ಚ / ಕೂಟಸ್ಥಮ್-ಅಚಲಂ ಧ್ರುವಮ್ ॥ 3 ॥

ಸಂನಿಯಮ್ಯೇಂದ್ರಿಯಗ್ರಾಮಂ / ಸರ್ವತ್ರ ಸಮಬುದ್ಧಯಃ ।
ತೇ ಪ್ರಾಪ್ನುವಂತಿ ಮಾಮೇವ / ಸರ್ವಭೂತಹಿತೇ ರತಾಃ ॥ 4 ॥

ಕ್ಲೇಶೋಽಧಿಕತರಸ್ತೇಷಾಮ್ / ಅವ್ಯಕ್ತಾಸಕ್ತಚೇತಸಾಮ್ ।
ಅವ್ಯಕ್ತಾ ಹಿ ಗತಿರ್ದುಃಖಂ / ದೇಹವದ್ಭಿರ್-ಅವಾಪ್ಯತೇ ॥ 5 ॥

ಯೇ ತು ಸರ್ವಾಣಿ ಕರ್ಮಾಣಿ / ಮಯಿ ಸಂನ್ಯಸ್ಯ ಮತ್ಪರಾಃ ।
ಅನನ್ಯೇನೈವ ಯೋಗೇನ / ಮಾಂ ಧ್ಯಾಯಂತ ಉಪಾಸತೇ ॥ 6 ॥

ತೇಷಾಮಹಂ ಸಮುದ್ಧರ್ತಾ / ಮೃತ್ಯು-ಸಂಸಾರ-ಸಾಗರಾತ್ ।
ಭವಾಮಿ ನ ಚಿರಾತ್ಪಾರ್ಥ / ಮಯ್ಯಾವೇಶಿತ-ಚೇತಸಾಮ್ ॥ 7 ॥

ಮಯ್ಯೇವ ಮನ ಆಧತ್ಸ್ವ / ಮಯಿ ಬುದ್ಧಿಂ ನಿವೇಶಯ ।
ನಿವಸಿಷ್ಯಸಿ ಮಯ್ಯೇವ / ಅತ ಊರ್ಧ್ವಂ ನ ಸಂಶಯಃ ॥ 8 ॥

ಅಥ ಚಿತ್ತಂ ಸಮಾಧಾತುಂ / ನ ಶಕ್ನೋಷಿ ಮಯಿ ಸ್ಥಿರಮ್ ।
ಅಭ್ಯಾಸಯೋಗೇನ ತತೋ / ಮಾಮಿಚ್ಛಾಪ್ತುಂ ಧನಂಜಯ ॥ 9 ॥

ಅಭ್ಯಾಸೇಽಪ್ಯಸಮರ್ಥೋಽಸಿ / ಮತ್ಕರ್ಮ-ಪರಮೋ ಭವ ।
ಮದರ್ಥಮಪಿ ಕರ್ಮಾಣಿ / ಕುರ್ವನ್-ಸಿದ್ಧಿಮ್-ಅವಾಪ್ಸ್ಯಸಿ ॥ 10 ॥

ಅಥೈತದ್-ಅಪ್ಯಶಕ್ತೋಽಸಿ / ಕರ್ತುಂ ಮದ್ಯೋಗಮಾಶ್ರಿತಃ ।
ಸರ್ವಕರ್ಮಫಲತ್ಯಾಗಂ / ತತಃ ಕುರು ಯತಾತ್ಮವಾನ್ ॥ 11 ॥

ಶ್ರೇಯೋ ಹಿ ಜ್ಞಾನಮಭ್ಯಾಸಾತ್ / ಜ್ಙಾನಾತ್-ಧ್ಯಾನಂ ವಿಶಿಷ್ಯತೇ ।
ಧ್ಯಾನಾತ್-ಕರ್ಮ-ಫಲತ್ಯಾಗಃ / ತ್ಯಾಗಾತ್-ಶಾಂತಿರ್-ಅನಂತರಮ್ ॥ 12 ॥

ಅದ್ವೇಷ್ಟಾ ಸರ್ವಭೂತಾನಾಂ / ಮೈತ್ರಃ ಕರುಣ ಏವ ಚ ।
ನಿರ್ಮಮೋ ನಿರಹಂಕಾರಃ / ಸಮ-ದುಃಖ-ಸುಖಃ ಕ್ಷಮೀ ॥ 13 ॥

ಸಂತುಷ್ಟಃ ಸತತಂ ಯೋಗೀ / ಯತಾತ್ಮಾ ದೃಢ-ನಿಶ್ಚಯಃ ।
ಮಯ್ಯರ್ಪಿತ-ಮನೋಬುದ್ಧಿಃ / ಯೋ ಮದ್-ಭಕ್ತಃ ಸ ಮೇ ಪ್ರಿಯಃ ॥ 14 ॥

ಯಸ್ಮಾನ್-ನೋದ್ವಿಜತೇ ಲೋಕೋ / ಲೋಕಾನ್-ನೋದ್ವಿಜತೇ ಚ ಯಃ ।
ಹರ್ಷಾಮರ್ಷ-ಭಯೋದ್-ವೇಗೈರ್ / ಮುಕ್ತೋ ಯಃ ಸ ಚ ಮೇ ಪ್ರಿಯಃ ॥ 15 ॥

ಅನಪೇಕ್ಷಃ ಶುಚಿರ್ದಕ್ಷ / ಉದಾಸೀನೋ ಗತವ್ಯಥಃ ।
ಸರ್ವಾರಂಭ-ಪರಿತ್ಯಾಗೀ / ಯೋ ಮದ್ಭಕ್ತಃ ಸ ಮೇ ಪ್ರಿಯಃ ॥ 16 ॥

ಯೋ ನ ಹೃಷ್ಯತಿ ನ ದ್ವೇಷ್ಟಿ / ನ ಶೋಚತಿ ನ ಕಾಂಕ್ಷತಿ ।
ಶುಭಾಶುಭಪರಿತ್ಯಾಗೀ / ಭಕ್ತಿಮಾನ್ಯಃ ಸ ಮೇ ಪ್ರಿಯಃ ॥ 17 ॥

ಸಮಃ ಶತ್ರೌ ಚ ಮಿತ್ರೇ ಚ / ತಥಾ ಮಾನಾಪಮಾನಯೋಃ ।
ಶೀತೋಷ್ಣ-ಸುಖ-ದುಃಖೇಷು / ಸಮಃ ಸಂಗವಿವರ್ಜಿತಃ ॥ 18 ॥

ತುಲ್ಯನಿಂದಾಸ್ತುತಿರ್ಮೌನೀ / ಸಂತುಷ್ಟೋ ಯೇನ ಕೇನಚಿತ್ ।
ಅನಿಕೇತಃ ಸ್ಥಿರಮತಿರ್ / ಭಕ್ತಿಮಾನ್-ಮೇ ಪ್ರಿಯೋ ನರಃ ॥ 19 ॥

ಯೇ ತು ಧರ್ಮ್ಯಾಮೃತಮಿದಂ / ಯಥೋಕ್ತಂ ಪರ್ಯುಪಾಸತೇ ।
ಶ್ರದ್ದಧಾನಾ ಮತ್ಪರಮಾಃ / ಭಕ್ತಾಸ್ತೇಽತೀವ ಮೇ ಪ್ರಿಯಾಃ ॥ 20 ॥

ಓಂ ತತ್ಸದಿತಿ ಶ್ರೀಮದ್ಭಗವದ್ಗೀತಾಸೂಪನಿಷತ್ಸು ಬ್ರಹ್ಮವಿದ್ಯಾಯಾಂ ಯೋಗಶಾಸ್ತ್ರೇ
ಶ್ರೀಕೃಷ್ಣಾರ್ಜುನಸಂವಾದೇ ಭಕ್ತಿಯೋಗೋ ನಾಮ ದ್ವಾದಶೋಽಧ್ಯಾಯಃ ॥12 ॥