Gita - Easy Chanting - Chapter 15

ಶ್ರೀಮದ್ಭಗವದ್ಗೀತಾ ಮೂಲಂ - ಪಂಚದಶೋಽಧ್ಯಾಯಃ

ಓಂ ಶ್ರೀ ಪರಮಾತ್ಮನೇ ನಮಃ | ಅಥ ಪಂಚದಶೋಽಧ್ಯಾಯಃ । ಪುರುಷೋತ್ತಮಪ್ರಾಪ್ತಿಯೋಗಃ

ಶ್ರೀ ಭಗವಾನುವಾಚ

ಊರ್ಧ್ವ-ಮೂಲಮ್-ಅಧಃ-ಶಾಖಮ್ / ಅಶ್ವತ್ಥಂ ಪ್ರಾಹುರ್-ಅವ್ಯಯಮ್ ।

ಛಂದಾಂಸಿ ಯಸ್ಯ ಪರ್ಣಾನಿ / ಯಸ್ತಂ ವೇದ ಸ ವೇದವಿತ್ ॥ 1 ॥

ಅಧಶ್ಚೋರ್ಧ್ವಂ ಪ್ರಸೃತಾಸ್-ತಸ್ಯ ಶಾಖಾಃ / ಗುಣಪ್ರವೃದ್ಧಾ ವಿಷಯಪ್ರವಾಲಾಃ।

ಅಧಶ್ಚ ಮೂಲಾನಿ ಅನುಸಂತತಾನಿ / ಕರ್ಮಾನುಬಂಧೀನಿ ಮನುಷ್ಯಲೋಕೇ ॥ 2 ॥

ನ ರೂಪಮ್-ಅಸ್ಯೇಹ ತಥೋಪಲಭ್ಯತೇ / ನಾಂತೋ ನ ಚಾದಿರ್ನ ಚ ಸಂಪ್ರತಿಷ್ಠ  | 
ಅಶ್ವತ್ಥಮೇನಂ ಸುವಿರೂಢಮೂಲಮ್ / ಅಸಂಗ-ಶಸ್ತ್ರೇಣ ದೃಢೇನ ಛಿತ್ತ್ವಾ ॥ 3 ॥

ತತಃ ಪದಂ ತತ್ಪರಿಮಾರ್ಗಿತವ್ಯಂ / ಯಸ್ಮಿನ್-ಗತಾ ನ ನಿವರ್ತಂತಿ ಭೂಯಃ।
ತಮೇವ ಚಾದ್ಯಂ ಪುರುಷಂ ಪ್ರಪದ್ಯೇ / ಯತಃ ಪ್ರವೃತ್ತಿಃ ಪ್ರಸೃತಾ ಪುರಾಣೀ ॥ 4 ॥

ನಿರ್ಮಾನ-ಮೋಹಾ ಜಿತ-ಸಂಗ-ದೋಷಾ / ಅಧ್ಯಾತ್ಮ-ನಿತ್ಯಾ ವಿನಿವೃತ್ತ-ಕಾಮಾಃ।
ದ್ವಂದ್ವೈರ್-ವಿಮುಕ್ತಾಃ ಸುಖ-ದುಃಖ-ಸಂಜ್ಞೈಃ / ಗಚ್ಛಂತ್ಯಮೂಢಾಃ ಪದಮವ್ಯಯಂ ತತ್ ॥ 5 ॥

ನ ತದ್-ಭಾಸಯತೇ ಸೂರ್ಯೋ / ನ ಶಶಾಂಕೋ ನ ಪಾವಕಃ ।
ಯದ್-ಗತ್ವಾ ನ ನಿವರ್ತಂತೇ / ತದ್-ಧಾಮ ಪರಮಂ ಮಮ ॥ 6 ॥

ಮಮೈವಾಂಶೋ ಜೀವಲೋಕೇ / ಜೀವಭೂತಃ ಸನಾತನಃ ।
ಮನಃ-ಷಷ್ಠಾನಿ-ಇಂದ್ರಿಯಾಣಿ / ಪ್ರಕೃತಿಸ್ಥಾನಿ ಕರ್ಷತಿ ॥ 7 ॥

ಶರೀರಂ ಯದವಾಪ್ನೋತಿ / ಯತ್-ಚಾಪಿ-ಉತ್ಕ್ರಾಮತೀಶ್ವರಃ ।  

ಗೃಹೀತ್ವೈತಾನಿ ಸಂಯಾತಿ / ವಾಯುರ್-ಗಂಧಾನ್-ಇವಾಶಯಾತ್ ॥ 8 ॥

ಶ್ರೋತ್ರಂ ಚಕ್ಷುಃ ಸ್ಪರ್ಶನಂ ಚ / ರಸನಂ ಘ್ರಾಣಮೇವ ಚ ।
ಅಧಿಷ್ಠಾಯ ಮನಶ್ಚಾಯಂ / ವಿಷಯಾನ್-ಉಪಸೇವತೇ ॥ 9 ॥

ಉತ್ಕ್ರಾಮಂತಂ ಸ್ಥಿತಂ ವಾಪಿ / ಭುಂಜಾನಂ ವಾ ಗುಣಾನ್ವಿತಮ್ ।
ವಿಮೂಢಾ ನಾನುಪಶ್ಯಂತಿ / ಪಶ್ಯಂತಿ ಜ್ಞಾನ-ಚಕ್ಷುಷಃ ॥ 10 ॥

ಯತಂತೋ ಯೋಗಿನಶ್ಚೈನಂ / ಪಶ್ಯಂತ್ಯಾತ್ಮನ್ಯವಸ್ಥಿತಮ್ ।
ಯತಂತೋಽಪ್ಯಕೃತಾತ್ಮಾನೋ / ನೈನಂ ಪಶ್ಯಂತ್ಯಚೇತಸಃ ॥ 11 ॥

ಯದಾದಿತ್ಯ-ಗತಂ ತೇಜೋ / ಜಗದ್-ಭಾಸಯತೇಽಖಿಲಮ್ ।
ಯಚ್ಚಂದ್ರಮಸಿ ಯಚ್ಚಾಗ್ನೌ / ತತ್ತೇಜೋ ವಿದ್ಧಿ ಮಾಮಕಮ್ ॥ 12 ॥

ಗಾಮಾವಿಶ್ಯ ಚ ಭೂತಾನಿ / ಧಾರಯಾಮ್ಯಹಮ್-ಓಜಸಾ ।
ಪುಷ್ಣಾಮಿ ಚೌಷಧೀಃ ಸರ್ವಾಃ / ಸೋಮೋ ಭೂತ್ವಾ ರಸಾತ್ಮಕಃ ॥ 13 ॥

ಅಹಂ ವೈಶ್ವಾನರೋ ಭೂತ್ವಾ / ಪ್ರಾಣಿನಾಂ ದೇಹಮಾಶ್ರಿತಃ ।
ಪ್ರಾಣಾಪಾನ-ಸಮಾಯುಕ್ತಃ / ಪಚಾಮ್ಯನ್ನಂ ಚತುರ್ವಿಧಮ್ ॥ 14 ॥

ಸರ್ವಸ್ಯ ಚಾಹಂ ಹೃದಿ ಸನ್ನಿವಿಷ್ಟೋ / ಮತ್ತಃ ಸ್ಮೃತಿರ್-ಜ್ಙಾನಮ್-ಅಪೋಹನಂ ಚ।
ವೇದೈಶ್ಚ ಸರ್ವೈರ್-ಅಹಮೇವ ವೇದ್ಯೋ / ವೇದಾಂತ-ಕೃದ್-ವೇದವಿದೇವ ಚಾಹಮ್ ॥ 15 ॥

ದ್ವಾವಿಮೌ ಪುರುಷೌ ಲೋಕೇ / ಕ್ಷರಶ್ಚಾಕ್ಷರ ಏವ ಚ ।
ಕ್ಷರಃ ಸರ್ವಾಣಿ ಭೂತಾನಿ / ಕೂಟಸ್ಥೋಽಕ್ಷರ ಉಚ್ಯತೇ ॥ 16 ॥

ಉತ್ತಮಃ ಪುರುಷಸ್ತ್ವನ್ಯಃ / ಪರಮಾತ್ಮೇತ್ಯುಧಾಹೃತಃ ।
ಯೋ ಲೋಕ-ತ್ರಯಮ್-ಆವಿಶ್ಯ / ಬಿಭರ್ತ್ಯವ್ಯಯ ಈಶ್ವರಃ ॥ 17 ॥

ಯಸ್ಮಾತ್-ಕ್ಷರಮ್-ಅತೀತೋಽಹಮ್ / ಅಕ್ಷರಾದಪಿ ಚೋತ್ತಮಃ ।
ಅತೋಽಸ್ಮಿ ಲೋಕೇ ವೇದೇ ಚ / ಪ್ರಥಿತಃ ಪುರುಷೋತ್ತಮಃ ॥ 18 ॥

ಯೋ ಮಾಮೇವಮ್-ಅಸಂಮೂಢೋ / ಜಾನಾತಿ ಪುರುಷೋತ್ತಮಮ್ ।
ಸ ಸರ್ವವಿದ್-ಭಜತಿ ಮಾಂ / ಸರ್ವಭಾವೇನ ಭಾರತ ॥ 19 ॥

ಇತಿ ಗುಹ್ಯತಮಂ ಶಾಸ್ತ್ರಮ್ / ಇದಮುಕ್ತಂ ಮಯಾನಘ ।
ಏತದ್-ಬುದ್ಧ್ವಾ ಬುದ್ಧಿಮಾನ್-ಸ್ಯಾತ್ / ಕೃತ-ಕೃತ್ಯಶ್ಚ ಭಾರತ ॥ 20 ॥

ಓಂ ತತ್ಸದಿತಿ ಶ್ರೀಮದ್ಭಗವದ್ಗೀತಾಸೂಪನಿಷತ್ಸು ಬ್ರಹ್ಮವಿದ್ಯಾಯಾಂ ಯೋಗಶಾಸ್ತ್ರೇ
ಶ್ರೀಕೃಷ್ಣಾರ್ಜುನಸಂವಾದೇ ಪುರುಷೋತ್ತಮಯೋಗೋ ನಾಮ ಪಂಚದಶೋಽಧ್ಯಾಯಃ ॥15 ॥