ಭಗವತ ಗೀತೆಯು ಭಾವದ ಗೀತಿಯು

ಭಗವತ ಗೀತೆಯು ಭಾವದ ಗೀತಿಯು

ಭೂತದ ಭವ್ಯದ ಕನ್ನಡಿಯು!

ಮುಂದಿನ ಹಿಂದಿನ, ಅಂದಿನ ಇಂದಿನ

ಎಂದಿನ ಜ್ಞಾನದ ಚೆನ್ನುಡಿಯು….

ಜೀವದ ಜಗತಿನ ಈಶ್ವರ ಒಗಟಿನ

ತತ್ವವ ತೋರುವ ಪಾಠವಿದು

ಅವತಾರ ಪುರುಷನು, ಅವತರಿಸುವ ಬಗೆ

ಚಿಂತನೆಗೊದಗುವ ಯೋಗವಿದು!

ರಾಕ್ಷಸ-ದೈವದ ಗಣಗಳ ಗುಣಗಳ 

ಗುಹ್ಯವ ತೋರುವ ಶಾಸ್ತ್ರವಿದು

ಅರ್ಜುನ ಕೇಳಿದ ಪ್ರಶ್ನೆಗೆ ಉತ್ತರ

ಮೋಕ್ಷಕೆ ಒಯ್ಯುವ ಸೂತ್ರವಿದು! 

ಸೂಕ್ಷ್ಮಾತಿಸೂಕ್ಷ್ಮದ ವಿಷಯವ ಬಿಡಿಸುವ 

ಮರ್ಮದ ಧರ್ಮದ ಶಸ್ತ್ರವಿದು

ಋಷಿಗಳ ಮಂತನೆ, ವೇದದ ಚಿಂತನೆ, 

ಜ್ಙಾನಪ್ರಮಾಣಕೆ ರಾಜವಿದು!