Bhagawad Gita - Chapter 7 - Easy to Read

ಶ್ರೀಮದ್ಭಗವದ್ಗೀತಾ - ಸಪ್ತಮೋಽಧ್ಯಾಯಃ

ಓಂ ಶ್ರೀ ಪರಮಾತ್ಮನೇ ನಮಃ
ಅಥ ಸಪ್ತಮೋಽಧ್ಯಾಯಃ ।
ಜ್ಞಾನವಿಜ್ಞಾನಯೋಗಃ

ಶ್ರೀಭಗವಾನುವಾಚ
ಮಯ್ಯಾಸಕ್ತ-ಮನಾಃ ಪಾರ್ಥ / ಯೋಗಂ ಯುಂಜನ್-ಮದಾಶ್ರಯಃ ।
ಅಸಂಶಯಂ ಸಮಗ್ರಂ ಮಾಂ / ಯಥಾ ಜ್ಞಾಸ್ಯಸಿ ತತ್-ಶೃಣು ॥ 1 ॥

ಜ್ಞಾನಂ ತೇಽಹಂ ಸವಿಜ್ಞಾನಮ್ / ಇದಂ ವಕ್ಷ್ಯಾಮ್ಯಶೇಷತಃ ।
ಯತ್-ಜ್ಙಾತ್ವಾ ನೇಹ ಭೂಯೋಽನ್ಯತ್ /  ಜ್ಙಾತವ್ಯಮ್-ಅವಶಿಷ್ಯತೇ ॥ 2 ॥

ಮನುಷ್ಯಾಣಾಂ ಸಹಸ್ರೇಷು / ಕಶ್ಚಿತ್-ಯತತಿ ಸಿದ್ಧಯೇ ।
ಯತತಾಮಪಿ ಸಿದ್ಧಾನಾಂ / ಕಶ್ಚಿನ್ಮಾಂ ವೇತ್ತಿ ತತ್ತ್ವತಃ ॥ 3 ॥

ಭೂಮಿರಾಪೋಽನಲೋ ವಾಯುಃ / ಖಂ ಮನೋ ಬುದ್ಧಿರೇವ ಚ ।
ಅಹಂಕಾರ ಇತೀಯಂ ಮೇ / ಭಿನ್ನಾ ಪ್ರಕೃತಿರಷ್ಟಧಾ ॥ 4 ॥

ಅಪರೇಯಮ್-ಇತಸ್ತ್ವನ್ಯಾಂ / ಪ್ರಕೃತಿಂ ವಿದ್ಧಿ ಮೇ ಪರಾಮ್ ।
ಜೀವಭೂತಾಂ ಮಹಾಬಾಹೋ / ಯಯೇದಂ ಧಾರ್ಯತೇ ಜಗತ್ ॥ 5 ॥

ಏತದ್ಯೋನೀನಿ ಭೂತಾನಿ / ಸರ್ವಾಣೀತ್ಯುಪಧಾರಯ ।
ಅಹಂ ಕೃತ್ಸ್ನಸ್ಯ ಜಗತಃ / ಪ್ರಭವಃ ಪ್ರಲಯಸ್ತಥಾ ॥ 6 ॥

ಮತ್ತಃ ಪರತರಂ ನಾನ್ಯತ್ / ಕಿಂಚಿದಸ್ತಿ ಧನಂಜಯ ।
ಮಯಿ ಸರ್ವಮಿದಂ ಪ್ರೋತಂ / ಸೂತ್ರೇ ಮಣಿಗಣಾ ಇವ ॥ 7 ॥

ರಸೋಽಹಮಪ್ಸು ಕೌಂತೇಯ / ಪ್ರಭಾಸ್ಮಿ ಶಶಿ-ಸೂರ್ಯಯೋಃ ।
ಪ್ರಣವಃ ಸರ್ವವೇದೇಷು / ಶಬ್ದಃ ಖೇ ಪೌರುಷಂ ನೃಷು ॥ 8 ॥

ಪುಣ್ಯೋ ಗಂಧಃ ಪೃಥಿವ್ಯಾಂ ಚ / ತೇಜಶ್ಚಾಸ್ಮಿ ವಿಭಾವಸೌ ।
ಜೀವನಂ ಸರ್ವಭೂತೇಷು / ತಪಶ್ಚಾಸ್ಮಿ ತಪಸ್ವಿಷು ॥ 9 ॥

ಬೀಜಂ ಮಾಂ ಸರ್ವಭೂತಾನಾಂ / ವಿದ್ಧಿ ಪಾರ್ಥ ಸನಾತನಮ್ ।
ಬುದ್ಧಿರ್-ಬುದ್ಧಿಮತಾಮ್-ಅಸ್ಮಿ / ತೇಜಸ್-ತೇಜಸ್ವಿನಾಮ್-ಅಹಮ್ ॥ 10 ॥

ಬಲಂ ಬಲವತಾಂ ಚಾಹಂ / ಕಾಮ-ರಾಗ-ವಿವರ್ಜಿತಮ್ ।
ಧರ್ಮಾವಿರುದ್ಧೋ ಭೂತೇಷು / ಕಾಮೋಽಸ್ಮಿ ಭರತರ್ಷಭ ॥ 11 ॥

ಯೇ ಚೈವ ಸಾತ್ತ್ವಿಕಾ ಭಾವಾ / ರಾಜಸಾಸ್-ತಾಮಸಾಶ್ಚ ಯೇ ।
ಮತ್ತ ಏವೇತಿ ತಾನ್ವಿದ್ಧಿ / ನ ತ್ವಹಂ ತೇಷು ತೇ ಮಯಿ ॥ 12 ॥

ತ್ರಿಭಿರ್-ಗುಣ ಮಯೈರ್-ಭಾವೈರ್ / ಏಭಿಃ ಸರ್ವಮಿದಂ ಜಗತ್ ।
ಮೋಹಿತಂ ನಾಭಿಜಾನಾತಿ / ಮಾಮೇಭ್ಯಃ ಪರಮವ್ಯಯಮ್ ॥ 13 ॥

ದೈವೀ ಹ್ಯೇಷಾ ಗುಣಮಯೀ / ಮಮ ಮಾಯಾ ದುರತ್ಯಯಾ ।
ಮಾಮೇವ ಯೇ ಪ್ರಪದ್ಯಂತೇ / ಮಾಯಾಮೇತಾಂ ತರಂತಿ ತೇ ॥ 14 ॥

ನ ಮಾಂ ದುಷ್ಕೃತಿನೋ ಮೂಢಾಃ / ಪ್ರಪದ್ಯಂತೇ ನರಾಧಮಾಃ ।
ಮಾಯಯಾ-ಅಪಹೃತ-ಜ್ಞಾನಾ / ಆಸುರಂ ಭಾವಮಾಶ್ರಿತಾಃ ॥ 15 ॥

ಚತುರ್ವಿಧಾ ಭಜಂತೇ ಮಾಂ / ಜನಾಃ ಸುಕೃತಿನೋಽರ್ಜುನ ।
ಆರ್ತೋ-ಜಿಜ್ಞಾಸುರ್-ಅರ್ಥಾರ್ಥೀ / ಜ್ಞಾನೀ ಚ ಭರತರ್ಷಭ ॥ 16 ॥

ತೇಷಾಂ ಜ್ಞಾನೀ ನಿತ್ಯಯುಕ್ತ / ಏಕ-ಭಕ್ತಿರ್-ವಿಶಿಷ್ಯತೇ ।
ಪ್ರಿಯೋ ಹಿ ಜ್ಞಾನಿನೋಽತ್ಯರ್ಥಮ್ / ಅಹಂ ಸ ಚ ಮಮ ಪ್ರಿಯಃ ॥ 17 ॥

ಉದಾರಾಃ ಸರ್ವ ಏವೈತೇ / ಜ್ಞಾನೀ ತ್ವಾತ್ಮೈವ ಮೇ ಮತಮ್ ।
ಆಸ್ಥಿತಃ ಸ ಹಿ ಯುಕ್ತಾತ್ಮಾ / ಮಾಮೇವಾನ್-ಉತ್ತಮಾಂ ಗತಿಮ್ ॥ 18 ॥

ಬಹೂನಾಂ ಜನ್ಮನಾಮಂತೇ / ಜ್ಞಾನವಾನ್ಮಾಂ ಪ್ರಪದ್ಯತೇ ।
ವಾಸುದೇವಃ ಸರ್ವಮಿತಿ / ಸ ಮಹಾತ್ಮಾ ಸುದುರ್ಲಭಃ ॥ 19 ॥

ಕಾಮೈಸ್-ತೈಸ್-ತೈರ್-ಹೃತಜ್ಞಾನಾಃ / ಪ್ರಪದ್ಯಂತೇಽನ್ಯದೇವತಾಃ ।
ತಂ ತಂ ನಿಯಮಮಾಸ್ಥಾಯ / ಪ್ರಕೃತ್ಯಾ ನಿಯತಾಃ ಸ್ವಯಾ ॥ 20 ॥

ಯೋ ಯೋ ಯಾಂ ಯಾಂ ತನುಂ ಭಕ್ತಃ / ಶ್ರದ್ಧಯಾರ್ಚಿತುಮ್-ಇಚ್ಛತಿ ।
ತಸ್ಯ ತಸ್ಯಾಚಲಾಂ ಶ್ರದ್ಧಾಂ / ತಾಮೇವ ವಿದಧಾಮ್ಯಹಮ್ ॥ 21 ॥

ಸ ತಯಾ ಶ್ರದ್ಧಯಾ ಯುಕ್ತಕ್ತಃ / ತಸ್ಯಾರಾಧನಮೀಹತೇ ।
ಲಭತೇ ಚ ತತಃ ಕಾಮಾನ್ / ಮಯೈವ ವಿಹಿತಾನ್-ಹಿ ತಾನ್ ॥ 22 ॥

ಅಂತವತ್ತು ಫಲಂ ತೇಷಾಂ / ತದ್-ಭವತ್ಯಲ್ಪ-ಮೇಧಸಾಮ್ ।
ದೇವಾಂ-ದೇವ-ಯಜೋ ಯಾಂತಿ / ಮದ್ಭಕ್ತಾ ಯಾಂತಿ ಮಾಮಪಿ ॥ 23 ॥

ಅವ್ಯಕ್ತಂ ವ್ಯಕ್ತಿಮಾಪನ್ನಂ / ಮನ್ಯಂತೇ ಮಾಮ್-ಅಬುದ್ಧಯಃ ।
ಪರಂ ಭಾವಮಜಾನಂತೋ / ಮಮಾವ್ಯಯಮ್-ಅನುತ್ತಮಮ್ ॥ 24 ॥

ನಾಹಂ ಪ್ರಕಾಶಃ ಸರ್ವಸ್ಯ / ಯೋಗ-ಮಾಯಾ-ಸಮಾವೃತಃ ।
ಮೂಢೋಽಯಂ ನಾಭಿಜಾನಾತಿ / ಲೋಕೋ ಮಾಮ್-ಅಜಮ್-ಅವ್ಯಯಮ್ ॥ 25 ॥

ವೇದಾಹಂ ಸಮತೀತಾನಿ / ವರ್ತಮಾನಾನಿ ಚಾರ್ಜುನ ।
ಭವಿಷ್ಯಾಣಿ ಚ ಭೂತಾನಿ / ಮಾಂ ತು ವೇದ ನ ಕಶ್ಚನ ॥ 26 ॥

ಇಚ್ಛಾ-ದ್ವೇಷ-ಸಮುತ್ಥೇನ / ದ್ವಂದ್ವ-ಮೋಹೇನ ಭಾರತ ।
ಸರ್ವಭೂತಾನಿ ಸಂಮೋಹಂ / ಸರ್ಗೇ ಯಾಂತಿ ಪರಂತಪ ॥ 27 ॥

ಯೇಷಾಂ ತ್ವಂತಗತಂ ಪಾಪಂ / ಜನಾನಾಂ ಪುಣ್ಯ-ಕರ್ಮಣಾಮ್ ।
ತೇ ದ್ವಂದ್ವ-ಮೋಹ-ನಿರ್ಮುಕ್ತಾ / ಭಜಂತೇ ಮಾಂ ದೃಢವ್ರತಾಃ ॥ 28 ॥

ಜರಾ-ಮರಣ-ಮೋಕ್ಷಾಯ / ಮಾಮಾಶ್ರಿತ್ಯ ಯತಂತಿ ಯೇ ।
ತೇ ಬ್ರಹ್ಮ ತದ್ವಿದುಃ ಕೃತ್ಸ್ನಮ್ / ಅಧ್ಯಾತ್ಮಂ ಕರ್ಮ ಚಾಖಿಲಮ್ ॥ 29 ॥

ಸಾಧಿ-ಭೂತಾಧಿ-ದೈವಂ ಮಾಂ / ಸಾಧಿ-ಯಜ್ಞಂ ಚ ಯೇ ವಿದುಃ ।
ಪ್ರಯಾಣಕಾಲೇಽಪಿ ಚ ಮಾಂ /ತೇ ವಿದುರ್-ಯುಕ್ತ-ಚೇತಸಃ ॥ 30 ॥

ಓಂ ತತ್ಸದಿತಿ ಶ್ರೀಮದ್ ಭಗವದ್ಗೀತಾಸು ಉಪನಿಷತ್ಸು ಬ್ರಹ್ಮವಿದ್ಯಾಯಾಂ ಯೋಗಶಾಸ್ತ್ರೇ 
ಶ್ರೀಕೃಷ್ಣಾರ್ಜುನ ಸಂವಾದೇ ಜ್ಞಾನ-ವಿಜ್ಞಾನ-ಯೋಗೋ ನಾಮ ಸಪ್ತಮೋಽಧ್ಯಾಯಃ ॥7 ॥